uMthunywa
Ncekwenhle Ncube
IZAKHAMIZI zakuleli sezixwayiswe ukuthi zingadli njalo zingathengisi izifuyo ezizibuyelayo ezibayeni zazo ngoba lokhu kulicala.
Isixwayiso lesi senziwe ngumantshi uMnumzana uGladmore Mushove othe asemanengi amacala athoniswayo asetheswe izakhamizi ezisuka ezigabeni ezitshiyeneyo okudla kanye lokuthengisa izifuyo eziduhileyo ezaziwa ngokuthi ngomazibuyela (stray).
Umantshi lo uthe izakhamizi kumele zibikele amapholisa kumbe ababona ngezifuyo nxa kulezifuyo lezi ezibayeni zazo.
Ekhuluma emthethwandaba weTredgold ensukwini ezisanda kwedlula umantshi lo uthe kulicala ukuthi umuntu athengise loba adle izifuyo ezingomazibuyela.
Umantshi lo uchaze lokuthi ngesikhathi egweba uJeffrey Nyirenda otholakale elecala lokutshontsha inkomo engelamnikazi ayigcine esibayeni sakhe ngokungekho emthethweni.
“Kulicala ukuthatha isifuyo esingayisiso sakho usidle kumbe usithengise. Nxa utholakala usenza lokhu uzatholakala ulecala lokutshontsha inkomo.
Umantshi lo uphinde njalo wachasisa ukuthi akukhathalekile umhlobo wesifuyo esidliweyo zonke ziyabophisa.
Intatheli ubuye yezwa ukuthi sekulamacala edlula isikhombisa abantu abadla izifuyo eziduhileyo ezigabeni asetheswe uzulu kulo umthethwandaba kunyanga ezintathu ezedluleyo.
Ababona ngezezifuyo bakhuthaza izakhamizi ukuthi isifuyo esingasiso sakho nxa sithe sangena emhlambini wakho kufanele ubikele usobhuku kumbe amapholisa ukuze lalapho sicatshile singahluphi.
Ngaphandle kwalokhu kuzasiza abanikazi bezifuyo ukuthi bathole izifuyo zabo ngesikhathi bezidinga.
