uMthunywa
Ngilenkinga kankosikazi ongangithembiyo.
Ngike ngangathembeki eminyakeni edluleyo kodwa ngalibona iphutha lami ngatshintsha.
Khathesi loba sizixoxela akasanginaki umane angikhumbuze ngabantu engake ngathandana labo okungiphatha kubi kakhulu ngoba mina sengicabanga yena kuphela.
Okubuhlungu kakhulu yikuthi sekungathi kangiseyiyo inhloko yomuzi, sesisizwa ngabakibo ukuthi senzani.
Ngiyamthanda futhi ngiyazi ukuthi ngamzwisa ubuhlungu ngesenzo sami.
Akukuhle ngitsho emzini wami.
Ngitsho locansi sengiluthola kanye ngemva kwesikhathi eside.
Impendulo:
Kuhle ngoba uyasazi isizatho esenza ukuthi unkosikazi wakho angakuthembi.
Kuhle ukutsho ukuthi utshintshile kodwa unkosikazi wakho kumele azibonele yena ngezenzo ukuthi usutshintshile.
Okwenziwa ngunkosikazi wakho kutshengisa indlela ahlukumezeka ngayo ngesikhathi uphuma emtshadweni wenu usiyabona phandle.
Kungenzakala ukuthi kunengi elingazange likukhulume lonkosikazi wakho ngemva kokwenzeka kini ngakho kulezinto ezinengi eziseleyo.
Kungaba kuhle ukuthi lizinike isikhathi like lihlale phansi likhulume ngokwenzakala phakathi kwenu.
Tshengisa ukuzisola ngesenzo sakho umtshele ukuthi ufisa liqale izinto kakutsha ngoba uzimisele ukulungisa izinto phakathi kwenu.
Khumbula lokuthi umdeni wangakibo ubuseduze kakhulu laye ngesikhathi wena usagijima labanye abesifazane okwenze basondela kakhulu eduze kwakhe.
Kangiseyiyondoda
BABAKAZI ngilohlupho olukhulu, iqolo lami libuhlungu njalo lesitho sami kasisavuki.
Lanxa ngiphakathi kohlupho lolu kodwa sengifuna ukuthatha.
Kwezinye izikhathi ngingaya emacansini iqolo lami lisala liqaqamba okumangalisayo.
Impendulo
Ungajahi ukuthatha ngaphandle uhlupho lolu olalo luze lulungisiswe.
Ungajaha ukuthatha wena ulohlupho olufana lalolu yikho okucina kubangela ukuthi ucine usehluleka ukuzala.
Gijima jaha uyedinga uncedo kumajaha lamantombazana angaphansi kweZinatha labanye abalencwadi ezibavumela ukwelapha.
Ungakwenza lokhu uzabona lomuzi wakho uzaqina ngoba phela vele umuzi yindlu yokulala.
Ungekela ukukwenza lokhu ungaqali ukuthi kusasa wethese umkakho icala ngoba uyabe edinga umuzi lapho okulendoda elamandla eqinileyo.
Kodwa ungakayi kulabo abelapha ngesintu qala kubodokotela.
Usangithanda yini engitshaya kangaka?
Linjani Babakazi, ngileminyaka yokuzalwa engu-30 njalo ngilomntwana oyedwa lomkami.
Umkami sesileminyaka engu-8 sisonke, uhlupho yikuthi uthanda omama.
Olunye uhlupho yikuthi uhlala njalonje engithethisa ngamagama abuhlungu kakhulu okungenza ngicine ngisiyabikela abadala bamkhuze kodwa aphinde akwenze futhi.
Kuyangikhathaza futhi ukuthi umkami kazili ngitsho ukungitshaya ngikhuluma nje ngilenxeba elesabekayo phezu kwelihlo.
Ngenzeni Babakazi ngoba kangisathembi ngitsho ukuthi uyangithanda.
Impendulo
Isintu sikubeka kuhle kakhulu ukuthi induku kayakhi muzi mntanami, abathandanayo kabahlukuluzani, njalo bayabekezelelana.
Lesi senzo somkakho sibi kakhulu njalo silihlazo.
Umendo awuthunyelwa gudwane sibili, nga liyathumeka lalizakuba yinhloli yakho njalo litsho ukuba lapho oyakhona uyazokhela amalahle ekhanda, lapho ozakhasa phezu kwamalahle ombondo abomvu gebhu.
Umendo kufanele kube li Zulu lakho lemhlabeni, umthombo ohlala umpompoza intokozo hatshi ukuba yisibaya sohlupho.
Ngempela uthando selupholile, luyaqanda emzini wakho.
Bikela abosendo lwakini lihlale phansi ubabonise zonke lezi izinto njalo bakuncedise ukuba ungenzani.
