uMthunywa
Tina Desire nkololo waBhanda
IKO tjemegwa ndaka tjemegwa zwangu. Ndake ndihinga ku Janzibeli zwangu kwema kodlanyana akapinda. Ndaka hinga adzina ndikabona kuti nhu wakula, watjifanila wana nkwinya.
Jita kwangu kose ndake ndiwana mhandala, koga handuka kwangu isala iwhanana nebamwe bayisana kakale.
Ndaka nyala moyo nehakana nebana bebakidzani netjaba tjose tjakabakidzana nami.
Ndake ndihinga nenhutana weLupane, wakakuleba ekupamha kuti ndatjifanilo wana mfumakadzi nekuti ndatji kula. Ndakawunzuwila lungano gwangu gwekuti ndohangana nembabe dzoga.
Nhutana wakandigadzabwe kuti pela kwegole tonoswika tose kuLupane andihakise nhu unamano.
Pela kwalo takanohangana ikweno kuLupane. Ndaka amutjigwa zwakanaka kuka dan’wa babakidzani be lakidziwa nkononyana wabvila kubuKalanga.
Nhutana wakatandabala ebudza babakidzani kuti ndovima nkadzi we lobola. Ndakatjenamisiwa nezila yakatutiwa nayo dzivula nezila yakalinga kutsime levula yakabe isuma ntome kwenzi wenhutana.
Tiligele zwedu pantuzi tibulayana nemanongo akagotjewa kwakapinda zwimwe zwanana zwibili. “Pindani ngeno boMaNgwe,” zwakama ntome kwebhakasa, nhutana bakabhuzwa zwibili nezwitatu imi tjamumoyo ndoti a, nasi atizi, ndabona tjimwe tjanana, ndaka tjilinga makumbo ndikabona man’a ndikabva ndabhuda mutjili. Tjimwe tjebubili ayi bva hhapa, nyenyedzi yehango, tjimonikanyemba tjino lezi tjedza mu hhalima. Waka alimbuyanana mwana wonhu, ndaka midza mate ndisingapedze, fupatila kwabo ndakalingilila magala tulo nematsambilo ayi tjamumoyo ndakati ndiye wandahhila. Nhutana bakadana bekanyala ndakazutula meho ndakalinga tanyayila kwaMaNgwe.
Dama lenhutana lekutanga wakati “Watjibona etji tje man’a?” Ndakabvuma ndakafala nditi eeeh tate, nhutana wakandila mbeli nendebo eti apeya ndobe ndawana nkadzi. Ndakabva ndalamba nditi imi ndada umwe uwe. Ayeyi kanti ndazwidila.
Ndaka tangigwa pasi diyiwa mano, kuyi nkadzi atayiko naka mwanangu, koga mano. Nhutana wakandibudza nezwiyeto zwakayipa nekwe mwana iwoyu wandada, koga moyo wangu wakalamba uwuda kusingate. Ndaka handuka nhindibudza iwhoyo nsi.
Handuka kwabo kutsime ndakakumbila nhutanha kuti ndibapeleke, wakabvuma newhi lipasi atjibona kuti ndabe ne mbayo dze ludo.
Ndakabva ndakumbila iye mbuyanana kuti andimilile. Wakandilingisisa mutjiso kunda pasi, eke Nkalanga, kana jekana unolahila, wakazwibonela nkono wakwako. Wakabe ebvuma kose kwandinoleba, wakandi gadzabwe kuti unowohanduka tipelekane kuzwitolo andilakidze hangwana yabo, ndakanoyi dila yakajalo. Nhutana wakalila nekuti ndobe ndahaka weman’a . . . “Akuneni mwanangu moyo wonhu awutobakigwa nkowhela.”
Titjazuwa papo wakahanduka mwana waNgwenya abe yega. Ndakatuna pamoyo nditi Mantombazana kuku bangu imwi makalala musatongo tsamba kuLupane . . . ayeyi atayiko naka kwemwana kozanw’a nami apa kene kotiwa mwaza?
Ndiswi abeya tatjilinga kuzwitolo . . . uwuntole mbisana weNkalanga. Ndimi wwoyo ndileba tjimumoyo mwana atjipedza mahhani antome kwezila ehahamula koga. Ndaka swika pazwitolo akotamisila yose whola n’holo kwakatjenamisa nhu wose. Umwe nhutana wake akaguta zwidlozwe wakabudza MaNgwe kuti apo wawana nlume ntja . . . mhandala yakabhakhwa nehoni, imi usihle mwanedu ndokuda semoto we mbaba.
Inoyendila mbeli.
