uMthunywa
Nkosilathi Sibanda
AMAQEMBU agxile kwezomgido lomculo wesiNtu asebonge abaqoqi bomncintiswano weChibuku Neshamwari ngosekelo, nanko umncintiswano lo ufikisa iminyaka engamatshumi layisithupha lonyaka.
Umkhosi wokujabulisa abantu lo uqoqwa yinkampani yeDelta Corporation isebenzelana logatsha lweNational Arts Council Zimbabwe (NACZ) lenhlanganiso yeZimbabwe National Traditional Dance Association (ZNTDA).
Azadibana amaqembu kubangwa imvuzo yemali kusukela mhlaka 27 Nkwenkwezi kuzabelo zonke. Lonyaka, umkhosi lo ulendikimba ethi “60 years Sithokozisa Ngezomgido”. Kuminyaka edluleyo, umncintiswano lo ubunxusa labathungi bezitsha zesiNtu, amangqongqo lokubukiswa kwempahla zakhathesi ezikufeshini kodwa zithungwe ngendlela echaza amasiko lomdabu.
Kumbiko othunyelwe iphephandaba likazulu, inkampani yeDelta Corporation ithe izimisele ukuqhubeka ngokuxhasa imigido lemculo yesiNtu, okuyikhona okumqoka emphakathi wabantu abaNsundu.
Kubikwa koBulawayo kuzancintiswana enkundleni ye-Blue Lagoon mhlaka 24 Nhlangula. Esabelweni seMatabeleland North kuzadibanwa ebhawa yeJabulani edolobheni leHwange mhlaka 8 Ntulikazi.
Abahlala esabelweni seMat South bazakholisa ngomcimbi ozaqhutshelwa koMaloxo eBeitbridge.
Kusenjalo, iqembu leHwange, elihlala lincintisa kulumkhosi, elePezhuba Pachena lithe selilungiselele.
“Singena siqonde ukuthi siyefinyelela kusigaba sama-final omncintiswano. Inhloso yikuthi sisebenze kuhle, sibe lempumela enhle,” kutsho leliqembu ngoLwesibili.
