uMthunywa
Langelihle Moyo
IZULU eline kunsuku ezimbalwa ezedluleyo libhidlize insimu zabalimi bengqoloyi indawo engaba ngamahekitha angu-218 esabelweni se-Matabeleland South.
UMqondisi kunhlanganiso ye-Agricultural Rural Development and Advisory Services esabelwemi se-Matabeleland South, uMnumzana Mkhunjulelwa Ndlovu uthe izulu lesiqotho liphambanise isilimo sengqoloyi ebesingakavunwa.
“Izulu leli eline kunsuku ezimbalwa ezedluleyo libhidlize isilimo sengqoloyi ebesingakavunwa. Abalimi balahlekelwe kodwa hatshi kakhulu, ayisikho okukhalisayo. Abalimi balahlekelwe ngamahekitha angu-218 phakathi kwangu-4 578 abelinyiwe.
“Indawo ezihlaselwe lizulu zaphanjaniselwa isilimo sengqoloyi yilezi; iGwanda amahekitha angu-34, Beitbridge 30, Mangwe 12, Insiza 76 kuthi iMatobo 66 amahekitha,” kulandisa uMnu Ndlovu.
Uphethe ngokukhuthaza abalimi ukuthi babone ukuba bayavuna isilimo sabo sengqoloyi izulu lingakani.
“Ngithanda ukuxwayisa abalimi bengqoloyi ukuthi bazame ngazo zonke indlela ukuthi bavune ingqoloyi yabo izulu lingakani kumbe isikhathi sezulu singakafiki.
“Esabelweni se-Matabeleland South lonyaka bekulinywe amahekitha angu-4 578 njalo besikhangelele 4 tonnes ku hekitha. Okwakhathesi abalimi sebenelise ukuvuna amahekitha angu-1 000,” kuphetha uMnu Ndlovu.
