uMthunywa
Samkelo Tshuma loEthel Ncube
ZIKHATHAZEKILE izakhamizi zakoSibasa eFilabusi kulandela ukuzwa ukuthi ezinye izihlobo zazo esezedlula emhlabeni zingabe zingaphumulanga ngokuthula ngoba imimoya yazo izulazula kwenye intaba ekulindawo into ebangelwa ngabantu abafuna inotho.
Ukukhathazeka kwezakhamizi lokhu kuqale kumaviki amabili edluleyo lapho okubizwe khona omunye umphurofethi ovela eGwanda ukuthi azoqinisa umuzi wesinye isakhamuzi.
Kuzwakale ukuba ngesikhathi umphurofethi lo okungasatholakalanga igama lakhe elungisa umuzi kaMaDube owaziwa ngokuthi nguNaFrosta kwavela ukuba kulowo muzi kulomunye olesandla ekuvuseni abantu abafayo okuyibo abalemimoya ezula entabeni abayibiza ngokuthi yiNtaba Encane.
Intatheli zikaMthunywa ziphuthume zayafika esigabeni lesi lapho ezizwe khona ukuthi abakoNaFrosta balesandla ekuvusweni kwemimoya ezulazula entabeni.
Usobhuku wakoSibasa uRachel Moyo uthe labo lokhe bemadolonzima ngokwavezwa ngumphurofethi kumaviki amabili edluleyo.
“Thina lathi samangala umphurofethi lo eveza ukuthi kulemimoya yabafayo ezulayo entabeni. Umphurofethi lo wathi esenza imithanithani yakhe wafikelwa ngumoya owawukhuluma njengomntakadadewethu uBekithemba Dube owabhubha ngomnyaka ka 2008.
“Indlela umphurofethi lo ayesenza ngayo lami nginje ngakholwa ukuthi umntaka dadewethu wavuswa njalo umoya wakhe uyasetshenziswa,” kutsho usobhuku Moyo.
Usobhuku wengezelele wathi umoya lo wawusithi uBekithemba wahle wavuswa ngelanga angcwatshwa ngalo kungakho umoya wakhe kanye leyabanye abavuswayo lokhe izula entabeni.
“Umoya lo wawusithi: “Ayisimi ngedwa thina sibanengi lapha esavuswayo koSibasa savuswa ngabadala siyabhodabhoda, phela mina yimi induna lapha koSibasa lamuhla lingijumile madoda lifunani kanti,” kutsho usobhuku Moyo.
UMthunywa ulevidiyo eyathathwa mhla umphurofethi lo efikelwa ngumoya lo lalapho esesithi usebisela umoya kaBekithemba ethuneni lawo.
Kuvidiyo le umphurofethi lo ubonakala eguqile ethuneni likaBekithemba lamanye amalunga emuli le ekhuleka ethi umoya kaBekithemba kawubuyele uyephumula.
Esinye isakhamuzi esale ukuveza ibizo sazibiza ngokuthi nguMnu Siwela sithe;
“Akulamuntu ongakwaziyo okwenzakala entabeni umphurofethi wakubeka kwacaca ukuthi abakoNaFrosta bavusa umuyi uBekithemba Dube bamsebenzisa ukuganga lanxa nje bona bezithi bangamakholwa bayasonta (ibizo lebandla silalo),” kutsho uMnu Siwela.
UNkosikazi kasobhuku uSamuel Dube walile ukukhuluma ngendaba le ethi kuhle ihlafunwe yinduna uSibasa ngoba abantukazana ngeke bakwazi ukuyimela.
“Indaba le yenzakele ngempela kodwa asifanelanga ukuthi siyikhulume ifuna induna ngokwayo njengoba yiyo umkhokheli wesigaba. Thina asingeke satsho lutho ngoba lathi kuyasehlula sinje ukuthi sikuthini,” kutsho uNkkz Dube.
Induna uSibasa kayitholakalanga ngesikhathi intatheli zethekelele khonale njalo ibilokhe ingabambeki ecingweni ukuthi itsho ngodaba lwemimoya le.
