uMthunywa
Ethel Ncube
BAYAJABULA abahlabeleli beZimbabwe abahlabela beseMzansi Afrika ngemva kokuba ingoma zabo zikhethwe kuTop 10 yengoma zomnyaka.
Abahlebeleli laba baphiwe izicoco lezi kunyanga ephelileyo. Abangu-6 abathole izicoco bayizizalwane zeZimbabwe, abathathu ngabe South Africa kuthi oyedwa uvela eBotswana.
UMthunywa uxhumane lomunye owomsakazo weMaqhawenentaba onguye owayephatheka emcimbini wabathola izicoco uNobuhle Makhwelintaba obike ukuba bazama ukukhulisa abahlabeleli.
“Sizama ngazo zonke indlela ukuba abahlabeleli basekhaya bakhule emculweni. Kuthe umnyaka uphela abantu bavotela ingoma zomnyaka i-Song of the Year eziyizo ezingene kuTop 10 lapho esibe labahlebeleli baseZimbabwe abayisithupha oyedwa ubevela kweleBotswana,” utsho njalo.
Phakathi kwalaba baculi uThembi Msana nguye yedwa odabuka eMzansi. Abahlabeleli laba bathole izicoco, imali kanye lezithupha baphinda bathola ithuba lokukhuluma labalandeli kumsakazo,” kubika uNobuhle.
Uqhubekele phambili eveza ukuba ukubapha izicoco akuphelelanga lapho kuphela kodwa baphinde babenzela okunye.
“Ngempelaviki abaculi bonke abangena kuTop 10 sihambe labo sayakudla labo isidlo semini sixoxisana labo ukuba indondo abazitholileyo abangazigcini emakhabothini kuphela kodwa kazibavulele amanye amathuba amatsha okukhulisa imisebenzi yabo.
“Siyabonga kubalandeli bethu lakubahlabeleli bethu ngokuphatheka ku-Amaqhawenentaba FM Song of the Year Top 10,” kuphetha uNobuhle.
Abathole izicoco ngabalandelayo.
1. Nqam’ebomvu (Maskandi)
2. Msitshela (Gospel)
3. Thembi Msana (Gospel)
4. Iphimbo lethu (Gospel group
5. Amakholwa eNkosi (Gospel)
6. Adelaide Gasela (Gospel)
7. Ezebhubesi ‘The Lion ‘s pride (Afro Imbube)
8. Umthunzi wevangeli (Gospel)
9. FD ‘Usmile sentshintshi’(Maskandi)
10. Thobekile Mahlangu (Gospel)
