uMthunywa
YiNtatheli kaMthunywa
INHLANGANISO ye-Nurture Imvelo Trust ibika ngokukhathazeka okukhulu ngokwanda kwabantu abalunywa yizinja ezilobhova esabelweni seMatabeleland South.
Kubikwa ngomnyaka odluleyo, kube labantu abedlula i400 abalunywa yizinja ezicatshangelwa ukuba zilomkhuhlane wobhova. Umnyaka ka-2020 uphele inengi labantu livalelwe emakhaya ngenxa yezinqumo zokwenqabela ukumemetheka kweCovid-19.
Inani labantu abalunywa yizinja leli, lafuqa ukuthi inhlanganiso yeNurture Imvelo Trust isukumele phezulu ibambisane lohlangothi lukaHulumende olwe-Veterinary Services ukuze kukhankaswe ngokubaluleka kokuhlabisa izinja ijekiseni yokulawula ubhova.
Ukusebenzelana loHulumende lokhu kungaphansi kohlelo lokuqeda umkhuhlane wobhova kusiyafika umnyaka ka-2030. Sekufakwe icebo elikhulu lokuvuselela ama-public-private partnerships (PPPs), njengokuphawulwe luhlelo lweNational Development Strategy-1 (NDS1).
Ukwanda kwabantu abalunywa yizinja ezicatshangelwa ukuthi zilobhova kuvezwe nguProvincial Veterinary Officer wesabelo seMat South uDokotela Enat Mdlongwa ngesikhathi ekhuluma kumbuthano we-World Rabies Day eSigodini ngeviki edluleyo.
Umbuthano lo ubuqoqwe nguHulumende encedisana leNurture Imvelo Trust leSibanye Animal Welfare and Conservacy Trust.
UDokotela Mdlongwa uthe isibalo sabantu abalunywa yizinja kumnyaka odluleyo besisethusa.
“NgoMpandula ka2020, sathatha ama-sample ebantwini abangaphezulu kwe-458 abalunywa yizinja ezicatshangelwa ukuthi zilobhova. Lokhu kwasitshengisa ukuthi zinengi izinja ezilobhova emphakathini,” kutsho uDkt Mdlongwa.
Uthe ngenxa yemikhankaso ebikhona lokusebenzelana lenhlanganiso ezizimele zodwa, inani labalunywa yizinja liyehla. Uthe lonyaka sekulunywe abantu abangu-200.
“Lonyaka, kusiyafika uMpandula, sekulunywe abantu abangu-225 yizinja ezisolelwa ukuba lobhova.”
UNkosazana Sanele Ndlovu ongumqondisi weNurture Imvelo utshele iphephandaba likazulu ukuthi ekusebenzisaneni kwabo lomphakathi esiqintini saseMzingwane, bathole ukuthi ulwazi ngobhova ezinjeni lukhona, kodwa abantu badinga izeluleko ezithe xaxa ngokugcina impilakahle yezinja zabo.
“Abantu bakuthatha kancane ukuthi ubhova luyabulala abantu. Kumele silwisane lobhova ngokukhuthazana ukuthi sihlabise izinja ngesikhathi esifaneleyo,” kutsho uNksn Ndlovu.
“NjengeNurture Imvelo Trust sigxile kakhulu kunhlalakahle yenyamazana lasekulondolozeni imvelo.”
