uMthunywa
Thokozile Mbedzi
KULEZIGELEKEQE ezigqekeze kwenye imotsha esigabeni seMaphisa eKezi ngeviki ephelileyo zabaleka lemali efika phose iR8 000.
Izigelekeqe lezi kubikwa zigqekeze emotsha yeKings and Queens zatshontsha imali engange R7 950 kanye leRTGS$2 231.
Ekhuluma loMthunywa omunye umfakazi oqotho uMnumzana Bhekumuzi Sithole uveze ukuthi izigelekeqe lezi kucatshangelwa ukuthi zangena emotsha le phakathi kwehola lesihlanu ntambama lehola lesikhombisa ekuseni.
“Kukhanya izigebenga lezi zangena emotsha le phakathi kwehola lesihlanu ntambama lehola lesikhombisa ekuseni. Izigebenga lezi kazizange zibonwe ngumuntu ngoba kwakuvaliwe ngalesosikhathi.
“Kuyadanisa ukuthi abantu kabasahloniphi ngitsho lendawo lapho okugcinwa khona izidumbu.
“Kukhanya batshontsha imali engange RTGS$2 231 leR7 950. Lokhu kuphambanisa thina izakhamizi ngoba nxa inkampani ingavala yithi esizadubeka zona izigelekeqe lezi kungenzakala ukuthi kayisizo zalapha,” kulandisa uMnu Sithole.
Isikhulumi samapholisa esabelweni seMatabeleland South uInspector Philisani Ndebele ebuzwa ngaloludaba uvumile ukuthi solufikile ehofisini yabo.
“Udaba lwemotsha egqekeziweyo eMaphisa solufikile ewofisini yethu. Sithanda ukucebisa uzulu ukuba alandele indlela yokufaka imali emabhanga nsuku zonke ikakhulu labo abalamabhizimusi.
“Izigelekeqe lezi zingajayela ukuthola kulemali zicina zihlala zihlasela indawo ngoba zisazi ukuba zizathola kulemali,” kutsho uInsp Ndebele.
Uphethe ngokucela uzulu ongabe elolwazi lezigelekeqe ezenza icala leli ukuthi abikele amapholisa aseduzane laye.
“Uzulu ongabe elolwazi ngezigangi lezi sicela azise amapholisa aseduzane laye ngokubatshayela ucingo loba ngokuphosela incwajana kuma-suggestion box,” kuphetha uInsp Ndebele.
