uMthunywa
YiNtatheli kaMthunywa
Kube yisisanasana ubukhwa bezinja esigabeni seSomgolo eLupane lapho izakhamizi zakule indawo ezibhuqe khona omunye wabosobhuku balapha kanye lezinye inkokheli zesigaba kubangwa ukuthi utshontsha amabele eSocial Welfare.
Indaba le yenzakale ngoMvulo kuviki ephelileyo lapho uAllan Moyo adindwe khona yizakhamizi kubangwa amabele akade besithi ngawabo kukanti abengawezakhamizi ezihluphekayo.
UMthunywa ukhulumisane lomunye wezakhamizi ezazikhona ekutshayweni kukasobhuku lo uNkosikazi Siphiwe Magutshwa wachaza ukuthi usobhuku lo ubesehluphile ngobusela kule indawo.
“Besesitshile ngosobhuku lo ngoba ubesithathela amabele nsukuzonke ethi ngawenkokheli zodwa.
Into ebisisimangalisa yikuthi kambe inkokheli kungaba kuyizo zodwa ezenelisa ukudla yini.
“Yikho okudale ukuthi sibambane njengezakhamizi sizitshaye inkokheli lezi ukuze sithole amabele lathi,” kutsho uNkkz Magutshwa.
Ekhuluma lentatheli uMnumzana Danisa Mpala uveze ukuthi ukutshaya kwabo inkokheli zesigaba kubancede kakhulu.
“Ukutshaya kwethu inkokheli zesigaba kusincedile kakhulu ngoba kudale ukuthi lathi sithole amabele.
“Ngitsho ngoba inkokheli lezi bezizenzela umathanda kuthi nxa zisiyathatha amabele la eLupane zithi sikhiphe ama-$4 ngomuzi zisenzela ukuyazidlela imali yethu.
“Sithe sesitshaye inkokheli lezi uSikomitshi wabuya wazozikhuza khathesi sonke sesizathola kuhle amabele kungela kuqilwa,” kutsho uMnu Mpala.
Ebuzwa ngale indaba usobhuku lo otshayiweyo uMnumzana Allan Moyo uchaze ukuthi yena kazange atshontshe amabele ezakhamizi.
“Mina kangizange ngitshontshe amabele ezakhamizi kodwa ngathatha awami. Noma nje babethi bangitshayela amabele abo kodwa kangikwazi lokho,” kutsho uMnu Moyo.
Ekhuluma emhlanganweni wamabele obusesikolo seSomgolo ngoLwesithathu kuviki ephelileyo uSikomitshi weLupane uMnumzana Jusa Zachariya ubike ukuthi ozathatha amabele engawaphiwanga uzabotshwa.
“Zakhamizi, amabele la kasowabosobhuku kumbe ama-war veterans kodwa ngawezakhamizi.
Ngakho-ke ozawathatha ngokungekho emthethweni uzabotshwa kungakhathalekile ukuthi ngusobhuku kumbe ngubani ngoba wonke umuntu uyalamba okuchaza ukuthi kufanele athole amabele la.
“Okunye njalo ekulandweni kwamabele la izakhamizi akufanelanga zikhiphe imali ezinkulu kodwa kufanele zikhiphe i$1,50 ngomuzi eyokuthenga idizili yezimota ezizaletha amabele.
Ozaphambanisa ukulandela amazwi la engiwakhulumileyo libikele amapholisa abotshwe,” kuphetha uSikomitshi uZachariya.
