uMthunywa
Langelihle Moyo
IBANDLA leSeventh Day Adventist eMakokoba koBulawayo selibambisane izandla lesizwe sonke jikelele ukulwisa ukusetshenziswa kwezidakamizwa osekubhahile nanko ngoLwesihlanu kuviki ephelileyo kuqeqetshwe izakhamizi ezingu-25 ezichithe amahola angu-40 zifunda ngendlela zokulwisa ukusetshenziswa kwezidakamizwa emphakathini.
Izifundo lezi ebezihlose ukuphathisa umphakathi ukulwisa izidakamizwa ziqhutshwe nguMfundisi uMthulisi Mukwa Moyo onguMqondisi weRegenerated Life Substance Abuse Community Education Programme kunye logatsha olubona ngezempilakahle ebandleni leSabatha.
Ezifundweni lezi abaqeqetshileyo bafundiswe ngezidakamizwa ezikhona lezinsuku lokuthi kubonakala njani ukuthi umuntu usethatha izidakamizwa.
UMhlonitshwa kulo umcimbi wokunikwa kwezithupha, uMphathintambo obona ngokwenzakala koBulawayo, uJudith Ncube obemelwe nguNkosikazi uEbesta Lumelo uchaze ngobubi bokusetshenziswa kwezidakamizwa emphakathini weZimbabwe lasemhlabeni wonke jikelele.
“Ngiyajabula ngalokho elikwenza njengebandla libambene lomphakathi wonke lapha eMakokoba. Njengokuzimisela kwenu, liphume liyefundisa intsha ngoba isizwe sakusasa siyatshabalala kubangelwa yizidakamizwa ezihlukumeza umphakathi kanye lelizwe lonke jikelele,” kutsho uMphathintambo uNcube.
Ugcizelele ukuthi kumele sonke sibambane silwise ukumemetheka kwezidakamizwa.
“Wonke ozeleyo ulomlandu, asincedisaneni njengabazali lelizwe lonke jikelele siqede izidakamizwa, ngoba lokhu kuzwisa usizi.
“Isilinganiso se-60 phesenti salabo abasezibhedlela zabagula ingqondo kuyabe kubangelwa yizidakamizwa, asibazingeleni sibathole labo abazithengisayo.
“Kuqakathekile ukuthi singumphakathi sincedisane labomthetho ukuze siqede uhlupho lwezidakamizwa lolu esibhekane lalo oselusenza abantwana baphenduke umhlambi kazelusile bengasakhuzeki kunye lokuswela inhlonipho,” kutsho uMphathintambo uNcube.
Ekhuluma lentatheli kaMthunywa uMnumzana McKay Dube laye obesenza izifundo lezi onguHealth Worker eMakokoba uthe ukhathazekile ngendlela abatsha abatshaphaza ngayo ikusasa labo ngokusebenzisa izidakamizwa.
“Ngilusizi ngendlela intsha yalamuhla ezitshaphaza ngayo ngotshwala kunye lokusebenzisa izidakamizwa ezehlukeneyo. Lokhu kubenza bacine behlukumeza abazali ezindlini, abanye bafa bebancane, njalo abanye bayathatha impahla zabazali besiyathengisa ukuze bathole imali yokuthenga lezo zidakamizwa,” kulandisa uMnu Dube.
Okhulume emele abaqeqetshayo uNkosazana Rosemary Masina uthe kubuhlungu okwenziwa yintsha lamuhla.
“Ngizwa ngikhathazeka ngokuziphatha kwabatsha. Kasisaphephanga esigabeni njalo asisakwazi ukuthi sithembe bani ngoba wonke umuntu usekhangeleka njengesigebengu kubangelwa yizo izidakamizwa.
“Ngakho -ngokubona konke okubi okugoqela ubusela, ukufa kwabantwana bebancane lodlame osolukhona, lokhu kusenze sasukumela phezulu ukuthi siyefunda ngezidakamizwa lezi ezigoqela ingoma, imbanje le cocaine.
“Sifundisiwe lokuthi umuntu obhemayo lokunatha izidakamizwa ubonakala ngodlame, ukuphambana ingqondo, ukuba lihlongandlebe lobusela lokuthanda ingcekeza,” kulandisa uNkszn Masina.
Uhlelo lolu lokulwisa izidakamizwa lubuye lwagcizelelwa ngabafundi besikolo seBulawayo Methodist High School abePeer Club abenze umbukiso wabo ngaphansi kwesihloko esithi “Phansi ngezidakamizwa”.
Abanye abahlonitshwa akade bekuloluhlelo nguRaj Modi loKhomuredi Tshinga Dube.
