uMthunywa
Ethel Ncube
BEKUNGABIZWA ozwayo eAmphitheatre koBulawayo lapho iqembu leSunduza ebelisethulela uzulu amaphimbo amnandi kanye lomdlalo omutsha.
Iqembu leli eselileminyaka edlula 35 lihlabela ligxile kakhulu kumbube
ngeviki ephelileyo lihwatshe umdlalo omutsha okhuluma ngenyamazana zasendle.
UMthunywa uxhumane lomunye okuqembu leSunduza uCharlie Mahlaba oveze ukuba iqembu labo kalipheli moya lokhe lisiya phambili.
“Iqembu leli laqala ngo1985 kuze kube lamuhla iqembu lethu lokhe likhona lisenza umsebenzi wokujabulisa uzulu. Siqala sasihlabela imbube siliqembu sazotshintsha sesingena ekwenzeni imidlalo etshiyeneyo eqenjini leli singu-10 sihlangene omama labobaba. Njalo sesathola izicoco ezimbili kuma BAA’,’ kubika uCharlie.
Uqhubekele phambili eveza ukuba khathesi balomdlalo omutsha abawukhuphele abalandeli babo.
“Khathesi sisanda kukhupha umdlalo othi ‘uCecil isilwane’ lumdlalo ukhuluma ngenyamazana zasendle njalo ukhuluma langokuqakatheka kwazo.
Emdlalweni lo kuyaphinda kuthintwe imbali kaCecil Rhodes abalandeli bethu bawuthabele kakhulu njalo lokhu siyakubonga kakhulu.
Uphethe ngokuthi njengeqembu bazimisele ukuhlala bethokozisa uzulu kungakho banxusa uzulu ukuba abaxhase ngaso sonke isikhathi ngoba bavuselela amasiko,” kuphetha uCharlie.