uMthunywa
NguEthel Ncube
KUZAKUBE kungabizwa owayo ePumula Hall koBulawayo kuyonale iviki lapho okuzabe kugqitshwa khona inyanga yamasiko (Culture Month) lapho iqembu elibizwa ngokuthi Ezimnyama elizabe lijabulisa uzulu.
UMthunywa uzwe ukuba lumcimbi uzenzelwa ePumula lapho okuzabe kuhlangene amaqembu atshiyeneyo abalisa iSunduza, isikolo seQueen Elizabeth kanye leqembu leZimnyama lamanye amaqembu atshiyeneyo bekuzogqitshwa inyanga yamasiko.
UMthunywa uxhumane loDirector weqembu leZimnyama uPhibion Ncube oveze ukuba bayathokoza ukuba yingxenye yomcimbi.
“Iqembu leZimnyama liyajabula ukuba yingxenye yomkhosi weCulture Month Bulawayo ozakwenzelwa koBulawayo. Sizakube sikhona sigiya ngamasiko ethu njalo sisabelana ulwazi ngawo amasiko ethu ikakhulu ngokudla ukugqoka kanye lemigido yesiNtu.
Ukuba yingxenye yomcimbi lo kuqakathekile kakhulu kithi ngoba maduze nje siyabe siphuma sisiya emazweni sihamba ngawo amasiko ethu,” kulandisa uPhibion
Uqhubekele phambili echaza ukuba iqembu lakhe lize lomfutho lobunandi bonke.
“Size lokuhle kodwa sizabe sikholisisa uzulu sigida sihlabela kuvume phansi sigiya ngamasiko. Ngithanda ukunxusa uzulu ukuba asondele sizojabula sihlangene. Kuzaphakululwa ukudla kwamehlo lendlebe ngendlela emnandi okumangalisayo.”