uMthunywa
NJENGOBA sekusele imidlalo eyisitshiyagalombili ukuthi isizini yeCastle Lager Premier Soccer League iphele, sekulindelwe ukuthi kubonakale ukuthi yiwaphi amaqembu azenelisa ukugcina indawo kuligi le.
Kungabe kukhangelwe ukuthi yiphi ezaphetha iyintshantshu kodwa kulamaqembu ayisithupha ahlezi ngaphansi kwelogu, adonsa nzima. Amaqembu la alwela ukuthi angaxotshwa kuligi ephakemeyo.
Castle Lager Premier Soccer League
Phezulu kukhangelwe amaqembu abalisa FC Platinum ephethe imiklomelo engu-55 ngemva kwemidlalo engu-26. Abafana beDynamos balandela kunombolo yesibili bele-49, iChicken Inn layo ingabe isendleleni yombango wenkezo loba iphethe imiklomelo engu-45.
Izazi zomdlalo wenguqu yakuleli sezibhejele ukuthi kulisizini izimbamgodi zePure Platinum Play zizaphinda umphehlo, ziyithwale inkezo yeCastle Lager. Emsileni welogu, ziyabheda kumaqembu abalisa iWhawha, Tenax, Harare City, Bulawayo City leZPC Kariba. Iqembu elalibizwa ngokuthi lingelinye lezinkunzi zomdlalo, iCaps United lalo libalelwa kulezo ezingalukhutha ugatsha nxa lingehluleka ukunqoba imidlalo eseleyo.
Caps United
Onogada bejele, iWhawha, okwayo kusegcekeni ngoba angeke igcine indawo kuligi iphethe imiklomelo engu-20 kuphela. Ngokunjalo, iTenax iyasalela kunombolo yesi 17, ithwele imiklomelo engu-21.
Ezimbili ezisekelwa ngamadolobho amakhulu, iBulawayo City leHarare City ziyalandelana emsileni zitshiyene ngomklomelo owodwa. Amakhosi alemiklomelo engu-24, iHarare City ile-23. Iqembu leZPC Kariba linamathele kunombolo yesi-14 lemiklomelo engu-27.
Inombolo lezi ziveza ukuthi khona izatshisa impi yokugcina indawo emaqenjini onke la.
Lokhu kutsho ukuba imidlalo elandelayo, kusukela kulimpelaviki, izatshengisa ukuthi amathimu la azimisele okunganani ukuthi asale kuPSL. Imidlalo le izahlabusa ngoba kukhangelelwe ukuthi kunqotshwe lamaqembu amakhulu.
Impi le iqala ngoLwesihlanu lapho iqembu leHerentals elinxuse khona omakhelwane iYadah enkundleni yeNational Sports Stadium.
Abafana beBulawayo City badibana leCranborne Bullets ngoMgqibelo eLuveve. Lo yiwo umdlalo ozagcina kumbe uxotshise umqeqetshi uFarai Tawachera. Indlela iBulawayo City edlala ngayo kulezi insuku itshengisa ukuthi abadlali bayo sebekhalele, ngoba bebona ukuthi abalalo ikusasa kuligi ephekemeyo.
Iphephandaba likazulu likhulume lomqeqetshi uTawachera ngoLwesibili, otshele intatheli ukuba angeke ajikele ithawulo phansi.
“Okwamanje kufanele sinqobe yonke imidlalo yethu. Kumele senze konke okusemandleni ethu ukuthi singalahli imiklomelo ngoba lokho kuzakwenza ukuthi sicine sesiganyulwa lizembe,” kutsho uTawachera.
Amakhosi Amahle, iBulawayo Chiefs angena indlela eqonde enkundleni yeBaobab ukuyadinga inhlanhla kuNgezi Platinum. Umqeqetshi weBulawayo Chiefs, uNilton Terreso uzathemba abadlali bakhe, ikakhulukazi amaphahla uElvis loKevin Moyo, uKelvin Madzongwe lomgadli uPerfect Chikwende.
IHighlanders ngeSonto ibiza iTriangle. Umdlalo lo angeke ubengumthwalo kuBosso nanko yanqoba phezulu kwaleliqembu kumkhankaso wenkezo yeChibuku Super.
Imidlalo yeCastle Lager
kulimpelaviki:
NgoLwesihlanu: Herentals v Yadah FC (National Sports Stadium),
NgoMgqibelo: Bulawayo City v Cranborne Bullets (Barbourfields Stadium), Harare City v ZPC Kariba (National Sports Stadium), Whawha v FC Platinum (Ascot Stadium), Ngezi Platinum v Bulawayo Chiefs (Baobab Stadium)
NgeSonto: Highlanders v Triangle United (Barbourfields Stadium), Black Rhinos v Dynamos (Vengere Stadium), Caps United v Tenax CS FC (National Sports Stadium)
NgoLwesibili: Manica Diamonds v Chicken Inn (Vengere Stadium)
