uMthunywa
Nkosilathi Sibanda
ILIGI yenguqu kanobhutshuzwayo eyeCastle PSL isingena kuviki yamatshumi amabili lane.
Kumelelwe iqembu elizemuka iChicken Inn ebukhosini ngoba yiyo ithimu esemilonyeni yabanengi.
Lokhu kuzakuba nzima ngokutsho kukaLifa Ncube umgcinisihlalo weChicken Inn. UNcube uveze ukuthi lonyaka inkezo yeCastle izakweqa umfula kaShangani.
“Kanti kuzaze kube nini inkezo yeligi ithwala sigaba sinye. Lathi sifuna ukutshengisela ukuthi inguqu idlalwa indawo zonke kuleli.
“Iqembu lethu leChicken Inn selitshengisele ukuthi selibalelwa kulawo ayizikhulu zenguqu. Ukuyihluthuna inkezo ibuye kithi yikho esikufunayo. Sekusiba buhlungu kwamanye amathimu, ikakhulu nxa ingalane sesiyikhokhele okwamaviki amanengi kungela osondelayo,” nguNcube lo.
AmaGamecocks asebuthelele imiklomelo engamatshumi amane lasitshiyagalolunye ngokuhlohla amabhola angu-35.
Ukuqina kwalithimu kubonakala ngokuthi isinqotshwe kane kuphela.
“Sitshisekela ukuhlohla kuyo yonke imidlalo. Ithimu efuna ukuba yintshantshu kumele ihlohle lalapho edliwa khona. Lapha kuChicken Inn sesikubonile lokhu.”
UNcube uthe imfihlo yeChicken Inn yikuthi benelisa ukugcina umqeqetshi uJoey Antipas labadlali ababelabo ngomnyaka odluleyo.
Umgcinisihlalo lo kuhlandla lakuqala leligi waveza ukuthi lonyaka bazakwenza izimanga. Wakhuluma lentatheli ngoMbimbitho wathi: “Sifuna ukuqeda sikunombolo ehloniphekayo. Nxa kungenzeka, inkezo ingaba ngeyethu . . . ”
Ukuzethemba kukamgcinisihlalo kuzagcwaliseka ngempelaviki eBarbourfields mhla iChicken Inn isemukela iDynamos.
Amathimu alandela iChicken Inn kulogu yiFC Platinum leDynamos njalo zingabe ziwanqoba amathimu kodwa amaGamecocks ayalela phezulu.
IDynamos njengentshantshu ka2014, isebunzimeni bokuthi ilandele ngaphansi kwamanye amathimu isizini ize iyephela.
Loba iDeMbare isemuva ngemiklomelo eyisikhombisa, iseselethuba lokuhlasela. Labalandeli bayo bakholwa okufanayo.
Kumidlalo eseleyo kuzakhanya ukuthi umqeqetshi kuzwa nguphi phakathi kwamathimu alwela ukuba yingqwele yenguqu.
IDynamos akukhulunywa ngayo kangako ngoba kuyaziwa ukuthi isemehlweni abantu. Ukudlala kwayo kulesi isigaba seligi kuyethusa ngoba kulapho ithimu le eyandise ukuhlupha.
Umumo ungatshintsha kumathimu amathathu aphezulu, ikhona engatshona kumidlalo yonke eseleyo, kukhuphuke engacatshangelwayo.