uMthunywa
Thokozile Mbedzi
ZILOKHU zinkemile izakhamizi zesigabeni seKeth eTongwe eBeitbridge ngemva kokuba elinye ixhegu lizihilele ngeSonto ngoba linikwe incwadi yokuvikela i-protection order.
Ixhegu leli, uTimothy Ndou obeleminyaka engu-51 kubikwa ubeselesikhathi eside engazwanani lonkosikazi wakhe uHappiness Ngulube ocine esiyamangalela umkakhe ukuthi kabahlalisananga kuhle wacina enikwa i-protection order.
Kubikwa uNdou isinqumo lesi kasizange simhambe kuhle kungakho wasezihilela.
Ekhuluma lentatheli kaMthunywa uElia Dube uthe lokhe bemangele ngesiga esibehleleyo njengezakhamizi zakulindawo lapho esithi. “Isinqumo esithethwe nguNdou sisethusile ngoba njengomuntu omdala bekulezinye indlela akade bengaxazulula ngayo inkinga le kodwa yena ucine ebona angathi ukuzihilela kuqondile.
“Abadala laba ngomakhelwane, besekulesikhathi eside belokungazwisisani baze bayafikisana lemthethwandaba lapho uNdou aphiwa khona i-protection order eyiyo emenze wacina esezihilela endlini yakhe yokulala,” kulandisa uMnu Dube.
Isikhulumi samapholisa esabelweni seMatabeleland South uInspector Loveness Mangena ebuzwa ngodaba lolu uthe solufikile ehofisini yakhe.
“Udaba lwendoda ezibophele yafa ngemva kokuphiwa i-protection order solufikile ehofisini yethu.
“Nxa kulokungazwanani emakhaya sikhuthaza uzulu ukuthi abikele abaphathi besigaba, abafundisi loba amapholisa kulokuthi bacitshe imphefumulo sebehlangene lenkinga ezinje,” kuphetha uInsp Mangena.
