uMthunywa
Blessing Moyo
KULEXHEGU elileminyaka yokuzalwa engu-74 elimiswe phambi komthethwandaba weLupane lisetheswa icala lokudlwengula umzukulu walo oleminyaka engu-14 kathathu.
Umsolwa esingeke sachaza igama lakhe ngenhloso yokuvikela umamangala, ohlala esiqintini seLunka eLupane wetheswa amacala amathathu okudlwengula umzukulu wakhe.
Umtshutshisi kulelicala uNkosazana Nobukhosi Moyo ubikele inkundla ukuthi phakathi kwenyanga kaMpandula umsolwa wadlwengula umzukulu wakhe lo ongasahambiyo esikolo.
Kubikwa umamangala wabikela ugogo ngesenzo sikamsolwa kodwa wazithulela.
Uqhubekele phambili njalo esithi ngelinye ilanga ngenyanga kaMpandula umamangala wathunywa ngugogo wakhe ukuyathenga imbhida komunye umuzi umsolwa wamlandela.
Kubikwa umsolwa walaya umamangala ukuthi ageze kwesinye isifula ukuze axotshe imimoya emibi umamangala wakwenza lokhu.
Umsolwa wamncedisa ukukhulula impahla wathi ageze masinya andubana amdonsele esixukwini esiseduze wamdlwengula okwesibili bengavumelananga.
Kuhlandla lesithathu umsolwa waphinda wadlwengula umamangala emkulwini ngesikhathi ugogo eyekukha amanzi.
Inkundla izwe ukuba mhlaka 13 Mfumfu umsolwa waxotsha umamangala wathi kayekwenda komunye umphurofethi okuthiwa nguNgwenya kodwa wala.
Umamangala wabikela omunye umakhelwane onguye owacina esiyabikela amapholisa okwenza umsolwa wabotshwa.
Umantshi kulelicala uNkosazana Karen Jeffrey udlulisele icala leli emthethwandaba weHwange Regional Court mhlaka 28 Mfumfu.
Uphinde waxwayisa umsolwa ukuthi abhalele emthethwandaba ofanayo ukuze athole ibheyili.
