uMthunywa
Nkosilathi Sibanda
“Indoda ingehluleka lamhlanje, kusasa iphinde ivuke…,”
LE yingoma engabe isihlatshelwa nguMadinda Ndlovu umqeqetshi weHighlanders kulandela ukutshintsha kwesimo eqenjini lakhe.
Sekuyinjabulo yodwa enkambeni yeqembu leHighlanders nanko phela abadlali bayo sebethembise ukuba bazanqoba kuyo yonke imidlalo elandelayo.
Lokhu kuza ngemva kokuba iBosso idlale okungakaze kubonakale enkundleni yeBarbourfields mhla isidla ZPC Kariba 2-0. Kube yikugcwaliseka kwesitsho esithi indoda ngewa ivuke.
Batshibilike balichaya ibhola abafana bakamqeqetshi uMadinda Ndlovu bencitsha izethekeli lona ithuba lokweqa ingxenye yenkundla.
Amabhola ahlohlwe nguAriel Sibanda loTatenda Makanda asukumise inkundla yonke sekubonakala ukuthi igedi selivulekile kuleliqembu ebeseliqede imidlalo eyisitshiya galombili lingahlohli.
Ithemba beselilahliwe kubalandeli ababekezele amaviki bebukela leliqembu liphuma emfolweni.
UMakanda wacina ukuhlohla kunkezo kazibuse okwenze ukungena kwakhe kumdlalo odluleyo kwadala ukukhonona kulabo ababukeli ababengakaze bambukele. Kuthethe umzuzwana nje esengenile enkundleni ukuthi aligaxe emambuleni uMakanda.
Ibhola lakhe yilo elihlanyise inkundla ikakhulu ngendlela elixhokolwe ngayo lihwitha eceleni kwepali.
Loba inqobile ithimu yezwe lonke, okusuke kwangajabulisi abalandeli yikudlaliswa kwamathuba okuhlohla ngabagadli beqembu.
Lomgadli othenjiweyo uPrince “Mgadafi” Dube ulokhe esalidinga ibhola nanko ukhutha nsukuzonke.
Ekhuluma lozulu kuliviki, uDube uthe ulinde ngelibomvu mhla ezahlohla ibhola lakuqala eMagumeni.
“Ngelinye ilanga kuzalunga,” kutsho lumdlali eqeda kubonga usekelo lwabandeli beqembu.
Unozinti uAriel Sibanda uphume enkundleni eliqhawe njalo ubonge umdlalo wabanye bakhe eqenjini.
“Ukuba ngunozinti okwazi ukuvimba kudala yikuba yingxenye yeqembu eliqinileyo. Sengivale igedi behluleka ukungihlohla kumidlalo eyisithupha ilandelana. Sengivimbe imbekwa emibili, ngahlohla amabhola amabili futhi. Ngibonga abadlali bethu ngokutshengisa ukuzimisela,” kutsho uSibanda ophinda abengukaputeni.
Omunye wabokaputeni uTendai Ndlovu uthe iqembu selivukile.
“Selivukile iqembu. Ngendlela esidlala ngayo besizibuza ukuthi yini ehluphayo ngoba sisazi ukuba umdlalo siwuphethe.”
Iphephandaba likazulu likhulume lehlekana labalandeli ababukela lumdlalo mhla iBosso itshombuluka ababike ukuba sekumele iqhubeke idlala kuhle.
“Khathesi sengikholwa amazwi omqeqetshi uMadinda. Iqembu selijiyile. Bangumtshina abafana kodwa bekumele sihlohle amabhola amanengi.
“Sibe lomnyama wokukhutha igedi isikhathi esinengi. Amathuba besiwathola loba nje abadlali bebengawasebenzisi,” kutsho uThabisa “Gundu” Dube umsekeli weBosso oseGwabalanda.
Omunye wabalandeli uJabulani Sithole uthe: “Angeke ngibasole abafana ngokukhutha ngoba bebezama ukuthi bajabulise abantu. Bakhuze uvalo, basibonisa ukuthi hatshi, ibhola bayalazi okweqiniso.
“Ngilethemba lokuthi kumidlalo ezayo bazathuthukisa indlela abadlala ngayo behlohle amabhola amanengi,” kutsho uSithole.
Abanye babike ukuba sekuyisikhathi sokuthi umqeqetshi alolonge abagadli okuzwayo.
“Kulomsebenzi wokulolonga abadlali beBosso abazahlohla ngoba bayakhutha kakhulu ukulithela emambuleni. UMadinda usesebenze kakhulu ukwakha iqembu labafana abatsha. Siyabonga. Besisola kodwa sesiyibona imsebenzi yakhe.”
