uMthunywa
Nkosilathi Sibanda
NXA ungumsekeli weZiqholo zeZhwane ungahle ufake ithemba lokuthi iqembu leli lizatshisa kulisizini, nanko selithenge “injiva” ezimbili ebezidlala eSouth Africa kuminyaka edluleyo.
Umqeqetshi weTsholotsho FC uLizwe Sweswe ubike ngokugcweleyo ukuthi uselolonga abagadli ababili uMustafa Alex Ponyera oleminyaka yokuzalwa eyi-21, uJunior Prosper Zimidzi kanye loBrumo Mdanhire (21) ababedlalela amathimu akuligi encinyane eGoli.
USweswe uthe abagadli laba babetshibilikela iTsholotsho kudala kodwa basuka bayadinga umdlalo ongcono phetsheya kukaLimpopo.
“Abadlali bobabili ngabethu ngoba babengaphansi kwami bengakavakatsheli eSouth Africa. Angeke ngithi sibathengile, bona sebephendukile ekhaya.
“Bobabili ngike ngasebenza labo ngisaqeqetsha amathimu kumincintiswano yamaYouth Games, ngakho ngokuvakatshela eGoli, ngincenge abadlali laba ukuthi baphenduke ukuzodlalela iTsholotsho njengoba kwakuyithimu yabo,” kubika uSweswe.
I-Ziqholo zeZhwane ziqalise ukugijima, ziqinela isizini yalonyaka ngeviki ephelileyo.
UMthunywa uvakatshele enkundleni yeWhite City lapho obekugijima khona abadlali, kwatholakala ukuthi banengi abalesifiso sokudlalela ithimu le.
USweswe uthe kasoke azihluphe ngokudinga abanye abadlali ngoba usetholile akufunayo kubadlali abavela eGoli.
“Sekwanele ngabadlali engilabo. Ngangivele ngikhulumile ukuthi kulisizini ngifuna abadlali abangabagadli. Emuva kwenkundla ngiyasuthiseka ngemvimbi engilazo.”
Ngo2015, iTsholotsho FC ibaleke kancane kuhloka lokugamula amathimu avoxe udaka kuligi yeCastle.
ITsholotsho izitshaya isifuba ngalokhu.
Umqeqetshi lo uthe uyaziqhenya ngokuzimisela kwabadlali bakhe.
“Njengokutsho kwami ukuthi abafana bami basadinga ukujayela ukudlala enkundleni ezigcwele abalandeli, ngilethemba ukuthi lonyaka sebelesibindi sokumisana laloba ngubani emdlalweni.”
USweswe ucele abalandeli beTsholotsho ukuthi bangalahli ithemba ngoba abafana belakho ukubajabulisa njalo.
“KuPSL kunzima kodwa kumele ubone ukuthi lapho okumele uthole khona imiklomelo ungayidlalisi ngoba uzayidinga,” kuchaza uSweswe.
Kusukela kudala kubikwa i-Ziqholo zeZhwane zazisaziwa ngokuthi liqembu lamadoda kuzwa, abadlali abadinga ukunqoba ngaso sonke isikhathi.
Imbali yalo isuka ngo-2005 lapho lithimu eyaqala idlala inguqu yobungane kumaligi angatsholutho.
Ngemva kokunanzelela ukuthi banengi abafana abalethalenta eqenjini, inkokheli zayo zakubona kufanele ukuthi bangene kuDivision 3 ngo2006 okwenza kwabalula ukuthi babhaxabule amanye amathimu baphakame baye kuligi ephezulu.
Avuleka amathamsanqa kubadlali baleliqembu ngoba ithimu yahle yathola usizo kusomabhizimusi omkhulu kulindawo uMandla Manyathela.
Ithimu le loba ifisa ukuthi ihlale kuligi yePSL, ihlutshwa yikuthi iyehluleka ukusebenzisa inkundla yayo.
