uMthunywa
Nkosilathi Sibanda
UMCULI wakuleli uThembalenkosi Moyo usetshengise uthando alalo kumkakhe kungoma yakhe entsha ethi Swid’Lami, abike ukuthi izathinta inengi labantu elisadinga uthando lalabo abafuna ukuluqinisa emzini yabo.
UMoyo wethule ingoma le kumalanga ambalwa adluleyo, njalo ukhangelele ukuthi isabalale kuleli. Umculi lo wakhulela elokitshini leNkulumane njalo wake wahlabela engaphansi kukaBothwell Nkomo, odume ngelithi Bekezela.
Echaza ngokumunyethwe yingoma yakhe entsha, uMoyo uthe indikimba yayo igxile kwezothando.
“Ingoma yami entsha ibizwa ngokuthi iSwid’Lam. Le yingoma engayibhala ngenhliziyo yami yonke, ngiyihlabelela isithandwa sami uPriscilla Nkomo. Sesithandane okweminyaka eyisitshiya galombili.
Ungikhuthaze kakhulu njalo sesidlule kokunengi sisonke.
“Yingoma ekhuluma kabanzi ngothando lwami kuye. Ngiphakathi kokuhlanganisa idlalale engizalibiza ngokuthi Power of Love. Ngikhangelele ukuthi kube lidlalade elizakuba liphilisi elizelapha bonke asebekhalale ezothando,” kutsho umculi lo.
Uthe ingoma le izakubaphakathi kwedlalale elizayo eliphatha ingoma zothando.
“Lidlalade elizaduduza likhuthaza njalo bonke abadinga uthando labaphakathi kwalo. Ngifuna livule yonke iminyango evaliweyo ebantwini abadinga uthando. Ngicela abantu bakithi balalele ingoma yami entsha, balinde idlalade elizababusisa kwezothando.”
Uthe wasuka lezomculo esakhula eNkulumane.
“Ngiphuma elokitshini leNkulumane 12. Ngazalwa ngo-1989 ngakhuliswa ngugogo okunguye owangikhuthaza ukuthi ngilandele amaphupho ami.
“Ngaqala ezomculo ngisafunda esikolo seMgombane Primary lapho engangiqina khona nge-marimba.
Ngithe sengifunda eMandwandwe High, ngaqhubeka ngilolonga ubuciko bami, ngitshaya i-marimba ngifundisa labantwana besikolo njalo,” kutsho uMoyo.
Ubike ukuba ukusebenza loBekezela kwamvulela amathuba.
“Ngiqeda isikolo, ngahlangana loBothwell Nkomo, owaziwa ngokuthi nguBekezela owangifikisa enkundleni yeMakhosi Theatre lakumculo we-Afro Jazz. Mihla ngemihla uBekezela uhlala engikhuthaza enginikeza imibono kwezomculo. Ngahlabela laye ngiyi-backing vocalist, sehlukana siseSouth Africa.
Okwakhathesi ngifundisa i-marimba ezikolo lasenyuvesi yeWits eSouth Africa.
“Sengibhode amazwe amanengi kuzwekazi le-Europe ngifundisa i-marimba lezomculo. Kodwa ngithe ngibuyele emuva kancane ngiphindele kwezomculo. Lesi yisiqalo sohambo lwami olutsha.”
Ebalisa ngembali yakhe, uthe umdeni wakubo ulesiphiwo kwezomculo.
“Ngivela kumuli elethalenta kwezomculo. Ubabakazi, uFuture Moyo wayehlabelela umuyi uPaul Matavire. Ubabomncane wayeyingxenye yeqembu leSondela lamanye ayecula isicathamiya.
“Ngisakhula ngangihlala ngibathwalele ingungu lapho abaqhunsa khona kumbe nxa belolonga. Ngikholwa ukuthi yilapho engaqala ukufunda iziginci khona. Ngaba lothando lezomculo,” nguMoyo lo.
