uMthunywa
NguNontobeko Sibanda
BAMBALWA abantu abaphuma emaphandleni abaphatheka kumisebenzi yokulondoloza lokucecisa izikhumba zenyamazana zasendle eziphanyekwa kundawo zokuvakatshela kuleli.
Kodwa, lo kwaba ngumsebenzi owafunwa nguPolite Nyathi kusukela esakhula. UNyathi, odabuka esiqintini seMatshetsheni, eGwanda, wakhwabitha umsebenzi lo ngoba elothando lwenyamazana zasendle.
Ukulondolozwa kwezikhumba zenyamazana kubizwa ngokuthi yi-taxidermy.
UNyathi, oleminyaka engu-26 yokuzalwa, kazange abuyele emuva ekufezeni iphupho lakhe nanko wenza konke okusemandleni akhe ukuthi afundele umsebenzi lo eSouth Africa lapho asephenduke waba yingcitsthi kuwo.
Loba esezakhele ibizo, uNyathi uthe ufuna ukuchathekela abantwana abaphuma eMatshetsheni ulwazi lokwenza lumsebenzi. Uveze kabanzi ngobunzima ahlangana labo kweleSouth Africa, osekumenze wafisa ukuthi athole usekelo ukwenzela ukuthi aqhubeke ngomsebenzi wakhe kuleli.
“Ngifuna ukuthi abantwana beMatshetsheni bafundele lumsebenzi, senelise ukuthi siqale amankampani ngoba kulebhizimusi kiwo,” kutsho uNyathi, ekhuluma eseSouth Africa.
“Lokhu kudinga ukuthi sisekelwe ngamabhizimisi, amakhansili lezikolo ukuze sinyathele ndawonye. Okwamanje angilandawo eqondileyo yokuthengisela imifanekiso yami lapha kweleSouth Africa. Isifiso sami yikuthi ngiphenduke ekhaya ngithole indawo yami eqondileyo yokuthi ngithengise imifanekiso yami, ngincede lalabo abafuna ukufundela umsebenzi.”
Ukhuthaze intsha ukuthi isebenze gadalala ingakhangeleli phansi imisebenzi yezandla ukuze ithuthukise ilizwe leZimbabwe.
UNyathi uveze ukuthi waqalisa uhambo lokuba ngu-taxidermist lapho ekhangwe yimisebenzi yomqhatshi wakhe eGoli.
“Ngaqalisa umsebenzi wokulondoloza lokucecisa imizimba yenyamazana kulandela ukukhangwa yimbukiso yimifanekiso yenyoni kunye leyenyoka eyayibunjwe ngodaka isenziwa ngumqhatshi engangimsebenzela.
Ngacela ukuthi angifundise ukwenza imifanekiso wavuma, wangifundisa kungela mbadalo. Laye wasuthiseka ngendlela engangibumba ngayo, wahle wangiqhatsha kunkampani yakhe. Ngaqala ukuzisebenzela sengibumba inyamazana ezinkulu ngomnyaka ka2013.”
