uMthunywa
USATHUTHUMELA umdeni lomphakathi weHopewell ngaphandle kweMgungundlovu ngesenzo somfundisi (73), osolwa ngokuklabha intombi yakhe labazukulu bentombi ababili ngoLwesibili.
UNkosazana Thule Khanyisile Sibiya (46), ubulewe labazukulu bakhe oNomcebo Sibiya (8), lo-Asemahle Sibiya (5), abaklajwe umzimba wonke ngocelemba.
Iphephandaba leSolezwe lihambele le ndawo lafica lesi sigameko singundabamlonyeni futhi abantu betshaqekile. Isigameko senzeke kubo kamfundisi oleminyaka engu-73.
Udadewabo kamsolwa (59) esilalo igama lakhe kepha esingeke simdalule elandisela Isolezwe, uthe akubonileyo kumtshiye ethukile.
“Ngivuswe ngumfowethu ngabo-2 ekuseni, ethi kugcwele izidumbu endlini yakhe. Kungimangazile lokho ngoba besilale siziphuzele utshwala ngayizolo. Ngizitshele ukuthi uyadlala. Ube esesivulela endlini yakhe wakhanyisa, ngivele ngahayiza ngibona izingane zilele phansi, ziklajiwe.
“Unina wezingane ubengasethoyilethi. Ngiyasola kade ezama ukubaleka kanti ulimele kakhulu. Umfowethu uqale wathi akazi ukuthi balinyazwe ngubani. Ekuhambeni kwesikhathi sekukhanya simbone egcwele igazi, wazivumela yena emapholiseni ukuthi ubabulele. Asazi ukuthi kungani ebaklabhile ngoba lona wesifazane bekungumngani wami, belezinsuku ezintathu kuphela bethandana, asazi ukuthi bekwenzenjani.
“Ngifuna umfowethu abhadle ejele ngale nto ngoba angiphephile lami. Ngithuke kakhulu ngento engiyibonile,” kutsho udadewabo kamsolwa. Endaweni yesigameko bekusabonakala amachaphazelo egazi kodwa bese belihlanzile batshisa lazo zonke izimpahla ebezigcwele igazi.
“Umufi ubelesoka lakhe abesebethandane iminyaka citshe engu-16, waliyeka ngoba ethi umfowethu useyikhehla uzomphatha kahle amakhele umuzi kanti akazi uzobulawa ngesihluku. Umfowethu usiphuzisa utshwala nje izolo kanti yena uhlosile ukuchitha igazi? Ngiphatheke kabi kakhulu ngale nto eyenzekile kuleli khaya futhi angihambisani layo,” kutsho udadewabo kamsolwa.
Umndeni kamsolwa uthe ubengumfundisi ebandleni iPresbyterian.
Kuvele lokuthi umsolwa ubelilunga lekomithi emphakathini elibhekelele inhlalakahle.
Indodakazi kamufi, uNkkz Dolly Zuma, ithe batshaqekile ngokwenzekile njengoba unina ubelezinsukwana eqome umsolwa.
“Umama yilokhu ahamba ekhaya mhlaka 3 Mpalakazi esiyahola imali yeqolo akazange abuye. Sizwe ukuthi usethandana lalo baba ongumfundisi.
“Ubelokhu ehlezi khona emvakatshele. Kusimangalisile ukuba abulawe kanje labazukulu bakhe. Sisatshaqekile nje. Esikutholile yikuthi umama ubedlula ngasemzini kadadewethu (unina wezingane), zamkhalela zathi zifuna ukuyolala logogo.
“Zihambe kanjalo lomama ngeSonto kanti ekuseni ngoMvulo zizoklanjwa. Kubuhlungu kabi esikubonileyo,” kutsho uNkkz Zuma.
Uthe uNomcebo nguye abebemhambise esibhedlela i-Edendale wafika watshonela khona.
“Odokotela bazamile ukumhlenga kodwa kwaba nzima ngoba ubegencwe kane ekhanda, sekuphuma lobuchopho. Emzimbeni ubegencwe wonke. Asikaze siyibone into efana laleya,” kutsho uNkk Zuma.
Uthe bafisa umsolwa abhadle ejele ngakwenzile.
Okhulumela amapholisa KwaZulu-Natal, uCaptain Nqobile Gwala, uthe kuvulwe amacala amathathu okubulala, kwabotshwa umsolwa oleminyaka engu-73.
“Amapholisa aseThornville aphenya amacala amathathu okubulawa kowesifazane ona-46 labazukulu bakhe. Laba baklajwe ngobhushu ngumsolwa owaziwayo. Umsolwa oleminyaka engu-73 uboshiwe uzovela kusasa eNkantolo yaseMgungundlovu,” kutsho uCaptain Gwala. – Isolezwe
