uMthunywa
Cornelius Luphahla
NGENXA yendlala kube yisisanasana ubukhwa bezinja esigabeni seMagonteni, eLupane lapho okubhuqane amanye amanina kwaba luthuli eguswini ebanga amakhowa abesebiwe ngomunye.
Lokhu kwenzakale ngoLwesine kuviki ephelileyo lapho uMemory Sibanda othubulane loSimeleni Ngwenya bebanga amakhowa aluhlobo lwenowa abesebiwe nguMaNgwenya wawatshwathika exolweni lesihlahla segonte, uMthunywa ukuzwile lokhu.
UMthunywa ukhulumisane loNkosazana Sikholiwe Ncube walandisa ngokuvuka kwale impi le.
“Mina ngangikhona mhla kuvuka impi le siseguswini sidinga amakhowa emagonteni. Sathi sisasela amakhowa la ngezwa uMaSibanda esithi selahlekelwe yisitsha sakhe esilenowa. Kuthe kusenjalo ngezwa sesithi ucabangela ukuthi sifihlwe nguMaNgwenya ngoba nguye oke wathi usaya ngaphandle okwesikhathi eside njalo ubone unyawo lwakhe lapho obekulamakhowa akhe khona.
“Kuthe kusenjalo wasuka-ke waya kuMaNgwenya wayambuza mina ngakuthatha njengento encane nje. Into eyangimangalisayo yikuthi ngezwa sokungumkhosi uMaNgwenya sebhuqwa nguMaSibanda ngagijima ngayabalamula,” kutsho uNkszn Ncube.
UMthunywa ubuye njalo wakhulumisana loNkosikazi Makha Ngwenya ochaze ukuthi empini le uMaNgwenya waluma uMaSibanda kabuhlungu.
“Lami ngabizwa ngumkhosi kodwa angibonanga lutho ngathola uMaSibanda sevuza igazi esihlathini selunywe nguMaNgwenya. Ngathi ngibuza bangitshela ukuthi bebebanga inowa ngakho uMaNgwenya wayesevezile lapho azifihle khona ayezithatha,” kuchaza uNkkz Ngwenya.
UMthunywa wenelise njalo ukukhulumisana loNkszn Sibanda oveze ukuthi okwenza watshaya uMaNgwenya yikuthi wayemdelela.
“Mina ngangingajonganga ukumtshaya uMaNgwenya manje yena wangithethisa wathi ngiyamdelela uzangitshaya khonapho entshontshe inowa zami. Ngemva kwalokho wangilanda wangitshaya ngempama lami ngamsukela ngamtshaya kakhulu waze wangiluma. Noma nje wangiluma kungcono ngoba inowa zami waziletha,” kuphetha uNkszn Sibanda.
