uMthunywa
Ethel Ncube
KULEJAHA leTsholotsho elihlabela liseMzansi Afrika elikhiphe ingoma entsha ngenyanga kaMbimbitho ethi “Impilo yamanje” athakazelelwe ngabathandi bomculo we-rhumba.
Ingoma le ethi, “Impilo yamanje” iphekwe lijaha elidabuka eTsholotsho, uLastborn Mnkandla.
Ekhuluma loMthunywa umhlabeleli lo, uLastborn Mnkandla uthe ulokujabula ngengoma yakhe entsha.
“Ngilokujabula okukhulu ngengoma yami entsha. Abantu bayamukele ngezandla ezimhlophe ingoma le.
“Ingoma le iyodwa ngoba bengifisa ukuthi ngibone ukuba abantu bawamukela njani umculo wami ngoba ngokokuqala ukupheka ingoma.
“Ngikhangelele ukuthi kusiyafika uMfumfu ngibe sengipheke idlalade,” nguMnkandla lowo.
Uqhubekele phambili eveza ukuthi udinga usekelo kubalandeli bakhe ukuze baqhubekele phambili ngomculo.
“Sicela uzulu asixhase ngokungena enkundleni zokuxhuma elalele ingoma le. Abantu bangaba banengi abasilandelayo belalela ingoma le ngilakho ukuphakama njalo ngibe lomfutho wokupheka ezinye ingoma ezimnandi.
“Uxhanso lwabantu siyaludinga njengabahlabeleli beRhumba ukuze ingasaleli emuva layo iphakame njengeminye imdumo ehlatshelwayo,” kuphetha uMnkandla
