uMthunywa
Thokozile Mbedzi
INKUNDLA yenduna uChiya Chireya weGokwe ididene ngodaba olulethwe kiyo lapho okulendoda ekhala ngokuthi umkayo wahamba esiyadinga ukwelatshwa ngomunye umphulofethi kodwa kasafuni kuphenduka emzini wakhe ethi yena usefuna ukuthathwa ngumphulofethi lo abe ngumfazi wakhe wesibili.
Udaba lolu lumangalise inengi labantu nanko phela inina leli kubikwa liyala liyemba phansi ukubuyela kowalo umuzi lithi lona alikaze libone isiphatho esihle esifana lesikamphulofethi lo kungakho ke selizimisele ukuhlala laye.
Kubikwa inina leli beliselatshwa ngumphulofethi lo abambiza ngelokuthi Madzibaba Jacob. Ngesikhathi ethola usizo umama lo akwaziwa ukuthi kwahamba njani kodwa kukhanya laba ababili bahle baqala ukuthandana okwenza inina leli lacina lisala ukubuyela emzini walo.
Ikhuluma lentatheli kaMthunywa induna uChireya ithe kulendoda ekhalela umfazi oseyalela kumphulofethi.
“Kulendoda eze enkundleni yami izobika ngodaba lomkayo oseyalela komphulofethi. Indoda le ibikhala ezimathonsi ithi umama lo wasuka ekhaya engoyakwelatshwa kodwa khathesi usesithi usefuna ukuba ngumfazi wesibili walindoda.
“Indoda le ithi yona ayazi ukuthi laba ababili bacine bethandana njani. Uthe kukhanya baqale ukuthandana ngesikhathi beselaphana.
“Umphulofethi uthe esebona umama esesilile wamlaya ukuthi abuyele emzini wakhe yena wala ethi ngeke ngoba akuthole kumphulofethi akukho emzini wakhe, umkakhe kakaze amanzele khona kungakho yena kasabuyeli useyekuba ngumfazi wesibili kumphulofethi.”
“Lokhu akuzange kuphathe kuhle indoda kamama lo yabona ukuthi kungcono ukuthi ibikele inkundla ngodaba lolu.
Induna iqhubekele phambili yathi indoda le, umphulofethi kanye lenina babizwa enkundleni lakanye babuya yikho lapho inina elezwakala lisithi alisabuyeli kowalo umuzi.
“Babuya bonke enkundleni lakanye inina leli lathi lona alisafuni kubuyela emzini walo.
“Umphulofethi laye ebuzwa ngodaba lolu uthe uselikhulule inina ukuba libuyele emzini walo ngoba selasila kodwa inina leli lizimisele ukuba selingaba ngunkosikazi walo wesibili.
“Umphulofethi uthe lalo inina akula elingakwenza ngoba lithole izandla ezikhudumalayo lesiphatho esihle kuye.”
“Idale lisacwayisisa ngodaba lolu ukuze libone ukuba abantu laba bangaphathiswa njani. Thina kasithandi ukuba imizi ichitheke sifuna uzulu ahlale ngokuthula kanye lokubambana,” kuphetha induna uChireya.
