uMthunywa
Cornelius Luphahla
ZIKHALA ezimathonsi izakhamizi zeMagonteni eLupane ngenina eselibulalise abantu ababili kuthi abathathu basasesibhedlela ngenxa yethothotho okucatshangelwa ukuthi liyipheka liyihlanganise lefethalayiza.
Insindabaphenduli le yenzakale ngoMvulo kuyonale iviki lapho uMnumzana Thomas Ncube, uMnu Artwell Ngwenya loMnu Medias Nkomo abahlala kulesisigaba abanathe khona ithothotho eyenziwa nguNkszn Musa Moyo qede bayavukela esibhedlela.
Kubikwa umuzi kaNkszn Moyo subizwa ngokuthi kukoDandanda ngenxa yokupheka kwakhe ithothotho njalo sokwake kwafa abantu ababili bebulawa yithothotho le.
UMthunywa uxhumane loMnumzana Muzobanzi Mangena oveze ukuthi kuliqiniso ukuba amadoda la bawathwala ngenqola ekuseni bewasa esibhedlela engasakhulumi.
“Sithe sivuka ekuseni sezwa kuthiwa kulabantu abafileyo koDandanda ngenxa yethothotho sahle sagijimela khona.
Ekufikeni kwethu sathola ukuthi nguNgwenya labangane bakhe kodwa bebesaphila sahle sabathwala ngenqola sabasa esibhedlela seSt Luke’s.
“Lakho kube yinhlanhla ngoba sihle sathola imota endleleni yabahambisa kusasemasinya. Esibhedlela lapha bafike bathi banathe kakhulu utshwala babalalisa lalamuhla lokhe belalisiwe kodwa sebengcono ngoba sebekhuluma,” kulandisa uMnu Mangena.
UNkosazana Lethubuhle Ngwenya ongudadewabo kaMnu Ngwenya uchaze ukuthi kulomfowabo owake wafela emzini lo ekuqaleni kwalonyaka ebulawa yithothotho ngakho kakwazi ukuthi kungani umnewabo esiyanatha khona.
“Mina okungizwisa ubuhlungu yikuthi kulomnewethu okwakuthiwa nguJustice Ngwenya owatholakala ekuseni koDandanda efile esibhedlela bathi ubulewe yithothotho. Sithe sesibuzisisa ukuthi yithothotho bani le abantu bathi uDandanda uyipheka ayifake ifethalayiza.
“Kuthe kungakapheli umnyaka kwafa njalo esinye isakhamuzi laso sanatha khona ithothotho sayafela emzini waso. Khathesi sokuphose kwafa laba abathathu okuveza sobala ukuthi ithothotho le iyingozi. Ngesifiso sami ngabe uDandanda uyaxotshwa esigabeni.
Ebuzwa ngale indaba uNkszn Moyo uvumile ukuthi yenzakala wathi kasaphindi apheke kodwa kafaki ifethalayiza nxa eyipheka njalo abantu baphambanisa ngokuyinatha belambile.
“Kuliqiniso sibili ukuthi kulamadoda amathathu anathe inkankabezi emzini wami avukela esibhedlela kodwa nxa ngipheka ithothotho le kangihlanganisi lefethalayiza. Okungabe kulimaza abantu yikuthi abanye bayinatha belambile kukanti yona kayifuni kunathwa ungadlanga.
“Ngalokhu-ke angisaphindi ngiyipheke ngoba ingilethela izilingo lakuqala omunye wavuka efile ngemva kokuyinatha,” kutsho uNkszn Moyo.
Usobhuku wakule indawo uMnumzana Solomon Luphahla ebuzwa ngale indaba uthe kakho ekhaya kodwa uyakwazi ukuthi kwake kwafa abantu bebulawa yithothotho esigabeni sakhe.
“Indaba yabantu abatholakale esigabeni sami bedakwe yithothotho bavukela esibhedlela angikayizwa ngoba kangikho ekhaya kodwa ngiyazi ukuthi koDandanda kwake kwafa umuntu ebulawa yithothotho okuthiwa uyipheka ayifake ifethalayiza,” kuphetha uMnu Luphahla.
