uMthunywa
YiNtatheli kaMthunywa
UGATSHA olubona ngezoMhlabathi, Ezokulima, Amanzi kanye lokuthuthukiswa kwemaphandleni soluxwayise abalimi elizweni lonke jikelele ukuthi izulu elinileyo kwezinye ingxenye zelizwe le-Zimbabwe kayisilo lokuqalisa ukulima.
USikhwicamfundo Obert Jiri ongumabhalane kugatsha lolu kusitatimende esikhitshwe ngoLwesibili kuyonale iviki uthe izulu leli elinileyo ngelokuthi baqedise amalungiselelo abo okulima.
“Nginanzelela ukuthi kwezinye ingxenye zelizwe izulu selike lana ikakhulu kuyonale iviki. AbeMeteorological Services Department (MSD) baxwayisa abalimi ukuthi izulu leli ayisilo lokuqala ukulima.
“Ngakho-ke balimi likhuthazwa ukuthi lisebenzise izulu leli ukugebha lokulungisa amagodi enu awe-Pfumvudza/iNtwasa, lokulungisa inhlanyelo kanye lokufaka umquba.
“Okunye njalo likhuthazwa ukuthi lingahlanyeli lutho, lingafaki inhlanyelo phansi ngaphandle kwalabo abalamanzi lendlela yokuthelela izilimo zabo,” kulandisa uSikhwicamfundo uJiri.
Uphethe ngokuthi umkhathi uzavuleka maduzane, lokhu kuzancedisa laba abalime isilimo sengqoloyi ukuthi bavune kuhle.
“Lingavuni ingqoloyi yenu umkhathi ungakavuleki, ngaphandle kwalabo abalendawo ezinkulu ezomileyo njalo ezingangenisi amanzi yibo abangenelisa ukuvuna.
“Lokhu kwenzelwa ukuthi lingalahlekelwa kakhulu yisivuno senu,” kuphetha uSikhwicamfundo Jiri.
