uMthunywa
Ethel Ncube
KULENDODA yelokitshini lePelandaba West koBulawayo okunakanelwa ukuba yagwazwa yatshiswa ngunina kunye labafowabo andubana bathwale bayoyiphosela kwenye indlu eyakhiwayo.
Indaba le yenzakale ngeviki ephelileyo lapho umuyi, uTrymore Sibanda oleminyaka yokuzalwa engu-34 atholakale efile kwenye indlu eseduzane langakibo.
Inina okucatshangelwa ukuba labambana labantwabalo labulala uSibanda kubikwa lalithethwe nguyise kaSibanda osewedlula emhlabeni. Kubikwa inina leli lokhu uyise kaSibanda wabhubhayo kalizange lihlalisane kuhle loSibanda nanko phela bekuhlala kulokungazwanani.
UMthunywa uzwe ukuba umuyi lo waqala wathelwa ngamanzi atshisayo qede bamgwaza wafa bayafihla isidumbu sakhe endlini eseduzane labo eyakhiwayo.
Kuzwakale ukuba ngemva kwensuku ezimbalwa abantwana bathi bedlala basebesiyangena kulesosakhiwo okuyikho okwenza bazithela phezulu kwesidumbu sikaSibanda.
Kubikwa abantwana labo baphanga bayabikela abazali babo kukanti ngaleso sikhathi njalo omunye wabantwana wabikela abangane bakhe ukuthi isidumbu leso ngesomnewabo uSibanda njalo wabulawa ngunina labafowabo bayamphosela kuleyondlu. Intatheli ixhumane lonina omncane kaSibanda oveze ukuba udaba lolu lutshwaqisa umzimba.
“Asazi ukuba inina leli kungani lingazange limxotshe uSibanda njengoba evele engazalwa nguye kulokuthi bambambe bamthele ngamanzi andubana bamgwaze bambulale qede bayefihla isidumbu.
“Okwakubangwa akuveli sobala kodwa abantwana bakhuluma konke abakubonayo kusenziwa umnewabo betshela amapholisa.
“Umama lo labantwabakhe kumele babotshwe bayophikela isenzo sabo ngoba bayingozi emphakathini,” kutsho umfakazi lo ongumakhelwane ongathandanga ukuqanjwa ngebizo.
Elinye ilunga lemuli elikhulume lentatheli uNetsai Moto ubike ukuba umfana lo, wabhubha ngendlela engacaciyo.
“Liqiniso ukuba kulelunga lemuli elatholakala lifile kodwa sisalinde ukuba sizwe abomthetho ukuthi bathini.
“Esikuzwa kukhulunywa ngomakhelwane angingeke ngikutshele khathesi. Sizenelisa ukukhuluma singezwa umbiko wamapholisa,” kubika uNkszn Moto
Iphephandaba likazulu lixhumane lesikhulumi samapholisa koBulawayo uAssistant Inspector Nomalanga Msebele oveze ukuba udaba olunjalo sebelwamukele.
“Indaba le yafika kithi, umntwana oleminyaka engu-10 wathi edlala wabona isidumbu somuntu. Nguye owakhokhela amapholisa ukuthi asibone. Amapholisa ahamba langakibo kamufi athola kulegazi endlini phansi livalwe ngetshebetshebe.
“Sikhuthaza uzulu ukuba nxa belokungazwani bahlale phansi bazame ukukhumisana umlotha kulokuthi basuselane amanqe.
“Sicela uzulu nxa elolwazi ngabanye abetheswacala asithinte kumbe athinte amapholisa aseduzane laye ukuze babotshwe,” kubika uAsst Insp Msebele.
