uMthunywa
Thokozile Mbedzi
ZITSHAQEKILE izihambi ebezisebholohweni elikhulu leLimpompo eBeitbridge kulandela isehlakalo sokugwazwa kwenye indoda yafa kubangwa ibhele lezicathulo, uMthunywa ukuzwile lokhu.
UNdasukwa Masiri oleminyaka engu-34 obevela eSouth Africa kubikwa wafika lamabhele amabili ezicathulo ngoLwesine ngeviki edluleyo wacela uTalent Kapasura oleminyaka engu-34 yokuzalwa ukuthi amthwalele ngokuswelakala kwenhlanhla elinye ibhele laselicatsha.
Kubikwa uMasiri uthe etshelwa ukuthi ibhele selitshontshiwe wahle wasusela uKapasura amanqe, nanko phela wahwatsha isikhali esibukhali esikhwameni wamgwaza ngaso esifubeni wawela phansi.
Ekhuluma lentatheli uNkosazana Merry Moyo uthe lokhe elesithuli ngoba ababili laba balwa kwaba luthuli.
“Mina bengisedlula lami, ngafica ababili laba besilwa uNdasukwa esithi ngeke kwenzakale ukuthi ibhele lakhe lezicathulo livele linyamalale nje. Khonokho belokhu besilwa uMasiri wakhipha isikhali esikhwameni wahlaba uNdasukwa esifubeni okwabangela ukuthi ahle awele phansi abantu bamthwala bamgijimisela esibhedlela seBeitbridge lapho afika wadluliselwa phambili koBulawayo lapho abhubhela khona,” kulandisa uNkszn Moyo.
“Silapha silokhu sitshe amathe ukuthi kambe abantu bangaze bafe bebulalelana izicathulo nje.”
Isikhulumi samapholisa esabelweni seMatabeleland South ulnspector Loveness Mangena ebuzwa ngodaba lolu uvumile wathi solufikile ehofisini yakhe njalo basaluphenyisisa.
“Udaba lwamadoda amabili alimazana ebanga ibhele lezicathulo solufikile ehofisini yethu ngakho sisaluphenyisisa ,” kuphetha ulnsp Mangena.
