uMthunywa
Ethel Ncube
KULENDODA ethengisela emavinkilini eNkulumane Complex koBulawayo egwaze enye yayibulala kubangwa abathengi, ngoMvulo kuyonale iviki.
UMthunywa uzwe ukuthi umetheswacala uJabulani Maphosa oleminyaka engu-38 yokuzalwa ugwaze omunye athengisa laye esifubeni kanye ngokuswelakala kwenhlanhla wahle wedlula emhlabeni.
Iphephandaba likazulu likhulumisane lomunye wezakhamizi kule indawo uNkosazana Eveline Moyo ochaze ukuthi abathengisayo laba bebebanga abathengi.
“UMaphosa othengisa iziwiji kunye lamabhanana ugwaze omunye athengisa laye eNkulumane Complex kulandela ukuxabana ngokuthi omunye uhlezi endaweni yakhe ngokunjalo amakhasimende asethenga kulo owagwazwayo kulokuthi athenge kuye (uMaphosa).
“Impikiswano yakhula ngesikhatshana uMaphosa wasekhupha ingqamu wagwaza lo omunye wahle wawela phansi,” kutsho uNkszn Moyo.
Kubikwa kwabizwa i-ambulensi kodwa bathi befika bathi usedlule emhlabeni.
Amapholisa ekhasini labo le-Twitter baveze ukuba umetheswacala usesezandleni zamapholisa.
“Amapholisa abophe uJabulani Maphosa owetheswa icala lokugwaza umuntu esifubeni afe,” kubika amapholisa.
