uMthunywa
ZiNtatheli zikaMthunywa
Abaphurofethi bakoBulawayo bakhala ezimathonsi ngenxa yenina elaziwa ngokuthi nguNaHazy eselizakhele udumo ngokusiza abantu ukuthi baqinise imizi yabo ngemithi etshiyeneyo nanko phela selibathathele amakhasimende asegcwala kulo.
Umama lo osebenzela duze lakoNaik obizwa ngokuthi MaNdlovu kodwa owazakala kakhulu ngokuthi nguNaHazy uhlala egcwalelwe ngabantu belinde ukusizwa ngenhlupho ezitshiyeneyo ezibalisa ukuqinisa imizi, ukukhipha umnyama, ukuthola inzalo, ukuthola imisebenzi, umendo kanye lenzalo.
Inina leli kalisebenzisi mithandazo kumbe idlozi kodwa lisiza abantu ngemithi etshiyeneyo eliyithatha eGoli kunye leZambia.
Imithi eminengi ethengiswa nguNaHazy iyatholakala njalo kuma-pharmacy kunye lezitaladeni ithengiswa ngabantu kodwa inengi lithi liyazibuza ukuthi kungani yena kungathi ulebizabiza.
Ngelanga inina leli lisiza abantu abedlula ikhulu. Akubhadaliswa ukulibona kodwa imithi yakhona yiyo ethengiswayo kusukela ku 20 rand kusiya phezulu.
20 rand
Eminye yemithi ethengiswa nguNaHazy okubikwa ithandwa linengi labantu igoqela u-Fodo Finish okubikwa uyintshantshu ekuxotsheni ama-small house besekusiba loDeda Mnakwethu owenza umakhwapheni adedele eceleni.
Intatheli zivakatshele lapho okusebenzela khona uNaHazy zafica kungasi bantu belinde ukumbona.
UNkosazana Memory Sibanda ongomunye laye obelinde ukubona uNaHazy uthe imithi yakhe iyasebenza.
“Mina sengibuya okwesibili lapha, okwakuqala ngabuya lapha ngaphiwa imithi yokugeza lokuthi ngibulale amasali. Injongo yami yikuthi ngiqale ngilunge ngiphelele andubana ngiqale ukuqinisa umuzi wami,” nguNkszn Sibanda lo.
Elinye inina ebelikhanya lingumama osekhulile elithande ukwaziwa ngokuthi nguMaMoyo nje kuphela lithe lilande ukuzodingela umntanalo umuthi wenhlanhla.
“Ngigade ibhasi ngisuka ekhaya eLupane. Ngizodingela umntanami umuthi wenhlanhla kuNaHazy ngoba uthole umsebenzi njalo angifisi ukuthi ahambe elomnyama ongenza abanye bamhahabele emsebenzini. Ngifuna ehambe ekhanya kungabi lemimoya esukumayo emphambanisayo,” uMaMoyo.
Elinye inina njalo ebelilinde ukubona uNaHazy lithe alikaze libone imithi esebenza njengale elayinikwayo.
u-Fodo Finish
“Besengidubekile ngomkami obengeqiwa yizigqoko, engasangiboni lemali engasangiphi.
“Ngonela ukufika lapha kunyanga ezimbili ezedluleyo ngabona ubaba eseguquka ngendlela emangalisayo. Ubaba usefika endlini kusakhanya, kasalali engekho lekhadi lebhanga selihlala kimi.
“Ngempela uNaHazy ungikhiphe emalahleni avuthayo, khathesi sokuphileka emzini wami. Ngeke ngiphinde ngibuyele emuva ngoNaHazy.
Khathesi ngilande ukuzathola umuthi wokuthi kuhlale kunjalo,” kutsho inina leli elikhethe ukuvalwa ngebhetshu.
UMthunywa uvakatshele uNaHazy oveze ukuba yena inhloso yakhe yikusiza abantu.
“Ngisiza wonke umuntu ofika lapha, angikhethi muntu njalo nxa abantu befika kimi ngeke ngazi ukuthi lo ngumakhwapheni kumbe hatshi kodwa isimanga yikuthi imithi engibapha yona nxa umuntu eyi-small house efuna ukususa umnikazi wendlu kayisebenzi.
“Kubomama abahlutshwa ngama-small house umuthi ofana labo-Fodo Finish loDeda Mnakwethu iyabaxotsha ngenkani. Ngiyasiza njalo abantu abafuna imisebenzi labafuna inzalo, abalamasale kukanti ababuya lapha begula ngibakhuthaza ukuthi baye esibhedlela.
“Ngiyabhoda endaweni ezitshiyeneyo ngihamba ngisiza abantu. Sengike ngayasebenzela eSouth Africa, Zambia kunye leBotswana. Abanengi bayaphenduka sebezobonga ngemva kokusebenzisa imithi engiyabe ngibaphe yona,” utsho njalo.
