uMthunywa
Cornelius Luphahla
OKUKHULU akulamkhosi, lesisaga sigcwaliseke ngesenzo esenziwe ngesinye isalukazi sesigabeni seMgwadini, eNkayi esitshiye izakhamizi zakule indawo ziphethe izibindi ngezandla ngemva kokubika ukuthi sikhanywe yisibindi somntakamakhelwane waso esambulala sifuna inyama.
Imbedumehlwane le yenzakale kuviki ephelileyo lapho uNkosazana Girlie Baloyi (68) abikele khona uNkosazana Tracy Dube ukuthi nguye owabulala umntanakhe uPrisca Ndlovu (5) esenzela ukudla inyama yakhe, uMthunywa uyakuveza lokhu lamhlanje.
Kuzwakale ukuthi umntakaNkszn Dube wagula usuku olulodwa esithi ubizwa yisalukazi lesi wasebhubha okuyikho okwadala ukuthi uyise uMnumzana Brighton Ndlovu adinge inyanga.
UMthunywa uxhumane loNkosazana Sisasenkosi Dube ongudadewabo kaNkszn Dube wathi kalankani ngamazwi kaNkszn Baloyi.
“Mina ngathi ngizihlalele emzini wami labantwana bomnawami bathi unina uyangibiza emzini wakhe ngasengisiya khona. Ngathi ngifika ngamthola ekhala elomkakhe lezinye izihlobo zabo kanye loNkszn Baloyi. Ngathi ngibuza ukuthi kwenzenjani bathi uBaloyi uthi wakhanywa yisibindi somntanabo.
“Lokhu kwangethusa kakhulu ngambuza ukuthi wasidla kutheni wathi nguye owambulalayo efuna inyama. Ngalesosikhathi kakho owamphendulayo waze wabuyela emzini wakhe ngoba sonke sasesithithibele siswele esingakwenza,” kuveza uNkszn Dube.
Ebuzwa ngale indaba uyise womntwana lo owabhubhayo uMnu Ndlovu uthe uyayazi kodwa ngeke akhulume lutho ngayo ngoba usakhalela umntanakhe.
“Kuliqiniso sibili ukuthi kwathi kuleviki umntanami ebhubhile uBaloyi wabuya emzini wami ethi ukhanywe yisibindi somntanami. Ngokunjalo ngeke ngilandise lutho ngendaba le ngoba ngisakhalela umntanami. Okokuthi uBaloyi uyagula lapho akhona kangikungeni ngoba mina kangazi lutho,” kutsho uMnuNdlovu.
Umzukulu kaNkszn Baloyi, uMnu Zakhele Mafu uthe ugogo wakhe uyagula, ngeke akhulume lentatheli ecingweni.
“Ugogo uyagula ngeke enelisa ukukhuluma lawe njalo mina ngeke ngikulandisele lutho ngendaba le oyibuzayo,” kutsho uMnu Mafu.
Usobhuku omkhulu wakule indawo uMnumzana Danisa Ncube ebuzwa ngale indaba uvumile ukuthi uyayazi wathi iyamethusa laye.
“Indaba kaNkszn Baloyi eyokuthi wathi nguye owabulala umntakaNdlovu njalo usekhanywe yisibindi sakhe ngiyayazi sibili bangitshela kodwa ngaswela ukuthi ngiyiqalisele ngaphi. Khathesi uBaloyi uyagula kakhulu uthi lokhe ekhanyiwe,” kuphetha uMnu Ncube.
