uMthunywa
Thokozile Mbedzi
ZISELE zizidla amathambo engqondo izakhamizi zepulazini leDrummond eWest Nicholson kulandela ukutholakala kwesidumbu senye indoda okucatshangelwa ukuthi yabulawa ngemva kokukhandwa itshontsha amagwili singela nyawo lezandla.
UTorevasei Zhou oleminyaka engu-42 olipholisa lepulazini wafica uTrymore Ndabambi oleminyaka engu-32 elabangani bakhe betshontsha kodwa ayelabo benelisa ukubaleka wabamba uNdabambi wamtshaya waze wafa.
Intatheli ixhumane loMnumzana Tobias Ngwenya ongomunye walabo abaphatheka ekudingeni uTrymore engasabonakali.
“Thina sezwa ngomkhosi sekuthiwa uTrymore kabonakali yikho ukusabalala kwethu sisiyamdinga kodwa abanye babelokhu bekhuluma ukuba wabulawa epulazini yikho ukuyakwazisa umphathi wepulazi ukuthi kulomuntu ongabonakaliyo njalo wanyamalalela lapho.
“Kukhanya esebikelwe lokhu abantu bathola imvumo yokumdinga epulazini isidumbu satholakala ngemva kwesikhathi eside singeselanyawo kanye lezandla njalo sesisesimeni esibi,” kulandisa uMnu Ngwenya.
Isikhulumi samapholisa esabelweni seMatabeleland South uChief Inspector Philisani Ndebele ebuzwa ngodaba lolu uvumile wathi badingisisa udaba lapho okucatshangelwa ukuba ipholisa lepulazini libulale umuntu.
“Sidingisisa ngodaba lwepholisa elitshaye umuntu wafa lanxa kungaziwa ukuthi umtshaye ngani. Njengamapholisa sixwayisa abantu ukuthi akumelanga bafake umthetho ezandleni zabo kabahambise umuntu oyabe ephambanisile emthethweni ngoba sokulahleke umphefumulo,” kuphetha uChief Inspector Ndebele.
