uMthunywa
Cornelius Luphahla
IQEMBU lomculo we-rumba iBrunapeg Challengers elidume ngomculo walo othathekisa uzulu seliqalile njalo ukupheka elinye idlalade lomhlaba elizaphuma kungensuku zatshwala ngenhloso yokujabulisa uzulu.
Leliqembu lidabuka kwele Plumtree eBrunapeg njalo selakhipha amadlalade amane njalo kulelinye elisembizeni.
UMthunywa uxhumane loMba Tapela umhloli waleliqembu wachaza amadlalade abo abawakhiphayo ngesikhathi eqala ukuhlabela yedwa wabuya waveza ukuthi leli elizayo liphethe okukhulu.
“Lokhe ngaqala ukucula ngo2010 sengakhipha amadlalade amane agoqela elakuqala elithi; Odume Ngakho elika2010, kuze elithi Ngiyazisola elika2012, ngo2013 ngapheka elithi Moyo Wangu kuzophetha ngelika2014 elithi Impilo Ngumthwalo. Ngakho khathesi ngipheka elinye eledlula la engawakhiphayo.
“Idlalade elitsha leli lilengoma eziyisithupha ngoba ziyabe zizinde ngakho zingeke zenele kudlalade elilodwa.
Ngalokhu-ke ngithi abantu kabahlale bethiye indlebe kuphela ngoba limnandi okwamagama,” kutsho uTapelo.
UTapela uqhubekele phambili wachaza ukuthi uthanda ukuhlabela ebambisane labanye abahlabeleli ukuze apheke ingoma ezimnandi kakhulu.
“Mina ngithanda ukucula ngilabanye abaculi ukuze ngipheke ingoma ezimnandi. Abaculi esengike ngacula labo kumadlalade ami amadala nguMartin Ngwenya, uThemba Mathe, Prosper Bafana kanye loAllen Ndoda.
“Ngokubona kwami lokhu kwangikhulisa kakhulu kwezomculo yikho nje khathesi ngipheka idlalade elizethusa uzulu ngoba sengithuthuke kakhulu kwezokucula,” kutsho uMbaa Tapela.
UMgcinisihlalo waleliqembu leBrunapeg Challengers uErnest Ncube uchaze ukuthi umculi lo kukhanya uyaphakama kwezomculo.
“Iqembu leBrunapeg Challengers litshengisa ukuthuthuka kakhulu kwezomculo ngoba idlalade eliliphekayo luluju kuphela. Lami ngangingazi ukuthi lizafa lacula ngendlela ephakemeyo njengekuleli idlalade.
“Ngalokhu ngibonga abalandeli baleliqembu ngoba yibo abaliphakamisileyo yikho nje selicula okwedlula abaculi abadala,” kuphetha uNcube.
