uMthunywa
Ethel Ncube
AKUBIZWA ozwayo eTrenace esigodlweni samakhosi koBulawayo lapho okuzabe kulobunandi bodwa kuhlangene abahlabeleli balapha abatshaya beseMzansi Africa ngoMgqibelo wePhasika.
Umcimbi lo uzabe ukhona ngempelaviki njalo kungenwa mahala. Abanye abaculi abazabe betshaya lapha nguMartin leNdolwane Super Sounds, Clement Magwaza, uMadlela Sikhobokhobo, Dubai Masters lomphathi wohlelo uDJ Mapressa.
Ekhuluma lentatheli uDJ Promise Mapressa uveze ukuba njengabaculi abayizizalwane zakuleli bakukhangelele ukuzatshaya ekhaya ngePhasika.
“Ukuza ekhaya ukuzatshaya ngePhasika kuyinto ebesiyilindile njalo sithanda ukubonga usomabhizimusi omkhulu uGwizi owenelise ukubhadala amaqembu amahlanu ngasikhathi sinye ukuthi azotshayela abantu umculo omnandi.
“Ngimema bonke osomabhizimusi ukuba babe lenhliziyo efana lekaGwizi eyokuphakamisa abaculi bakuleli ngalindlela,” kubika uDJ Mapressa.
Intatheli ibuye yaxhumana lomunye wabahlabeli uClement Magwaza oveze ukuba abalandeli baze ngobunengi babo.
“Abalandeli kababuye ngobunengi bezojabula lathi. Into enkulu yikuziphatha kuhle abantu bajabule lathi, bengalwi njalo kungabi lobudlwangudlwangu.
“Ngithanda ukubonga njalo uGwizi ngokwelula isandla, siyambongela ngokuphakamisa abaculi balapha koBulawayo. Siyathaba kakhulu,” kubika uMagwaza.
Ekhuluma loMthunywa usomabhizimusi omkhulu uGwizi uchaze ukuba ulesifiso sokubona abaculi bethuthuka njalo umsebenzi wabo usabalala kundawana zonke zomhlaba.
“Ngizama ukuthuthukisa abafana bakithi ukuthi umculo wabo uthuthuke. Njalo okunye ngifuna abantu bakithi bajabule ngekhefu leli esiya kulo. Uzulu uyanxuswa ukuba abuye, akulamali ebhadalwayo ukungena yimahala. Utshwala lenyama kuzakube kuthengwa phakathi kungakho-ke uzulu kabuye sizojabula sindawonye kulikhefu,” kuphetha uGwizi.
