uMthunywa
Ethel Ncube
IZAKHAMIZI zesiqintini seSamlodi eGwanda zinathisana itiye ngembedumehlwana eyenzakale kwamanye amasela amabili okubikwa athi ngemva kokutshontsha imbuzi yesinye isakhamuzi azibona esegcwelwe zinyosi ebusweni, uMthunywa uyakuveza lokhu lamhlanje.
ULovemore Moyo loSiwinile Ndlovu kubikwa bafohla esibayeni sikaNkosazana Thandiwe Dube ebusuku bafika bathatha imbuzi eyodwa bahamba layo ngenhloso yokuyayithengisa kodwa behluleka ngoba izandla kunye lobuso sebugcwelwe zinyosi.
Ekhuluma loMthunywa umnikazi wembuzi uNkszn Dube uveze ukuthi ukulungisa isibaya sakhe kwamnceda kakhulu ngoba wayezalahlekelwa.
“Kwakusebusuku ngezwa imbuzi zami zikhala esibayeni ngacabanga ukuba ngamakhanka kanti ngitsho ngabanye abafana abathatha imbuzi yami.
Imbuzi
“Ngangingedwa ngesaba ukuphuma ngisiyakhangela ukuba kuhamba njani, ngavuka ngikhangela ekuseni ngabona zinyawo zabantu akade besesibayeni. Ngatshela omunye umakhelwane ukuthi imbuzi yami itshontshiwe ngaqeda iviki yonke ngibuza abantu ukuthi kabazange bayibone yini kodwa kangizange ngizwe umkhondo wayo ngasengilayelwa ngomunye ukuba ngenzenjani,” kubika uNkszn Dube.
Uqhubekele phambili eveza ukuba kuyini okwamsiza ukuthi imbuzi yakhe iphenduke.
“Ngalayelwa ukuba ngitshayele ucingo ugogo uChihoro, eHarare wangitshela ukuthi ngigade ngibuye. Ngagada ngeviki ephelileyo ngalubhekisa khona esigodlweni ngathi ngifika kuye wathi imbuzi yami ayikadliwa njalo ayikathengiswa ikhona abantu abayithathayo balayo.
“Wangitshela ukuba bazayiletha, ukuthi njani kakhulumanga wathi kungeke kudlule amalanga amabili bengayilethanga. Ngabuyela ekhaya, kuthe ekuseni kakhulu ngelanga lesibili ngivele kugogo uChihoro ngezwa abantu egedini bekhuluma ngayakhangela ngathola abantu bagcwelwe zinyosi ubuso bonke bekhanya ngamehlo, lamakhala langomlomo ukuthi ngabantu.
“Lwangitshaya lwangeqa uvalo, lami ngasengisesaba. Bafika bathi: ‘Mama sizoxolisa, silethe imbuzi yakho esayithathayo. Sicela usehlukanise lenyosi, asilali ebusuku silala lazo zibhuza.’
“Ngangikwazi ukuthi imbuzi izaphenduka kodwa ngangingazi ukuthi izabuya labantu bephelekezelwa zinyosi,” kutsho uNkszn Dube.
Ngabalayela ukuba batshiye imbuzi yami egedini ngabanika inombolo zikagogo uChihoro ukuba bamfonele bakhulume laye bamtshele iqiniso ukuthi benzeni basuka benjalo lenyosi zabo abaphendukanga kimi,” kutsho uNkszn Dube.
Ekhuluma lentatheli uLovemore Moyo ongomunye owatshontsha imbuzi uthe inyosi sezasuka.
“Kuliqiniso ukuba sasigcwelwe zinyosi ebusweni lengalweni sasikhanya ngamehlo ukuthi singabantu. Abantu besebesibalekela. Okokuthi satshontsha angeke ngikhulume ngakho,” kubika uMnu Moyo.
Iphephandaba likazulu lixhumane logogo Chihoro obike ukuba kuliqiniso ukuba kulomuntu owafika kuye etshontshelwe.
“Kulomama owafika kimi etshontshelwe ngafika ngamlungisela babuyisela imbuzi yakhe. Nxa usiza kimi ubuya lesigodo salapho okutshontshwe khona leUS$120 yakho ubuye ungene edale sikulungisele, okunengi ukuzwa phakathi,” kuphetha ugogo uChihoro.
