uMthunywa
Ethel Ncube
LIKHOMBA ngophakathi iqembu leNsimbi zeZhwane ngemva kokuthola esinye isicoco kuZBC ngeviki ephelileyo eHarare.
Iqembu leli elikhokhelwa nguMeluleki Moyo owazakala ngokuthi nguBrema lithole isicoco ngengoma yabo ethi iGPS ngemva kokuvotelwa nguzulu.
Ekhuluma loMthunywa umkhokheli weqembu leli uBrema ubike ukuba kuyajabulisa lokhu.
“Ingoma yethu esayihlabela siliqembu lomfowethu uMaElli ethi iGPS ivotelwe ngabalandeli bethu kuKhulumani FM okwenza saba ngabokuqala kuTop 50 chart sathola isicoco.
“Ukuthola kwethu indondo kwenza sibelamandla njalo kuyasiqinisa ukuba siqhubekele phambili sisebenza gadalala,” kubika uBrema.
Uqhubekele phambili ebonga abalandeli bomculo wabo ngokubaphakamisa.
“Ngethula isibongo esikhulu kubalandeli bomculo wethu ngithi siliqembu leNsimbi zeZhwane siyabonga ngokusisekela kakhulu, yini elasivotelayo sathola isicoco.
Qhubekelani phambili lisisapota lathi sizaqhubeka siliphekela okumnandi kodwa, asisoze silidanise. Siphinde sibonge njalo lomsakazi weKhulumani FM labanye bonke abaphatheke emsebenzini wokuba kube lezicoco. Siyabonga, lizizwe libongekile lonke,” kuphetha uBrema.
