uMthunywa
Ethel Ncube
SIZWAKELE isikhalazo sabalandeli bomculo weNsimbi zeZhwane, abakade bacela leliqembu ukuthi likhiphe ingoma ezintsha.
Kwenzakele ngempelaviki edluleyo lapho iNsimbi zeZhwane ezivumele phezulu ngokwethula ingoma ezintsha eMzansi.
Ingoma lezi ngezithi: Inhlansi, Ama Agenda, Iso Ngeso.
Iqembu leli, eselikhokhelwa nguMeluleki “Brema” Moyo likhiphe ingoma ezintathu lezi, okwakuqala lokhe uElvis “Ma Eli” wedlula emhlabeni nyakenye.
UMthunywa uxhumane lomaneja weqembu leli uBahlanu Sibanda ochaze okumunyethwe kungoma ezintsha.
“Ingoma eziphumileyo zintathu, ziyiExtended Play njalo zikuCD. Ingoma lezi ngezithi, Inhlasi, Ama Agenda, lenye ethi Iso Ngeso. Ingoma lezi ziphumele eMzansi ngesikhathi silomcimbi wethu wakuqala lokhe satshiywa ngabafowethu uMaEli loMaviri.
Insimbi zeZhwane
“Abalandeli bethu batshengise ukuthokoza okukhulu ngomsebenzi lo, okuveza ukuba bayamukela ngezandla ezifudumele njalo indazi isazokhala isiyaphambili,” kubika umaneja lo.
Uqhubekele phambili eveza ukubonga okukhulu kubalandeli bomculo wabo.
“Ngiletha isibongo esikhulu
kubalandeli ngokusisekela emculweni kunye lokuza kwabo bezolalela ingoma zethu ezintsha. Siyabonga, lonke lizizwe libongekile.
“Siphinde sibonge ukuba ingoma zethu sathi zisethulwa kwabakhona abasixhasayo abakhipha imali edlula R23 000. Lokhu kwatshengisa uthando abantu abalalo ngathi. Sithi kubalandeli, sikhona njalo sizaqhubeka silani siliphekela okumnandi.”
