uMthunywa
Blessing Moyo
INHLANGANISO ebona ngezokulima eye-Agritex isixwayise abalimi abafuye inkukhu ukuthi bazinanzelele ukuze zingahlaselwa yimikhuhlane etshiyeneyo ehlupha ngesikhathi sezulu.
Ekhuluma loMthunywa, uNkosazana Treggy Mpofu ongumlimisi eAgritex uthe kulemikhuhlane etshiyeneyo eyandise ukuhlasela inkukhu ngesikhathi sezulu okumele umlimi ayiqaphele ukuze inkukhu zakhe zingacini zisifa.
uNkosazana Treggy Mpofu onguHorticulture Specialist
“Kule-fowlpox okungumkhuhlane obangelwa kakhulu yiminyane kumbe ezinye izibungwana ezimunya igazi. Okwenza umkhuhlane lo wande ngesikhathi sezulu yikuthi imiyane iyabe iminengi ngenxa yezulu.
“Umkhuhlane lo uhlasela kakhulu inkukhu nxa isilugu sazo sinethela njalo lomlimi engatshintshi utshani osebunethiwe masinya,” kuchaza uNkszn Mpofu.
Ukuze umlimi avikele inkukhu zakhe kumkhuhlane lo kumele abone ukuthi lapho okulenkukhu zakhe iminyane ayifinyeleli ngoba kuyiyo ebangela umkhuhlane lo.
“I-fowlpox ngumkhuhlane ongelapheki lula kodwa nxa inkukhu isilomkhuhlane lo isidla inatha ilakho ukusila ngemva kwamaviki amabili.
“Kulomunye njalo umkhuhlane owandise ukuhlasela inkukhu ezilamaviki ayisithupha kusiya phambili. Inkukhu esihlaselwe ngumkhuhlane lo ikhipha okuluhlaza kumbe okulithanga njalo intamo iyabe isingathi iyatshilana.
“Umlimi engabona inkukhu zakhe sezihlaselwe ngumkhuhlane lo ulakho ukuvakatshela abe-veterinary loba abe-Agritex bambhalele umuthi ayezihlaba,” kuchaza uNkszn Mpofu.
Uphethe ngokuxwayisa abalimi ukuthi babone ukuba inkukhu zabo zihlala endaweni ehlanzekileyo zikhathi zonke.
