uMthunywa
Thokozile Mbedzi
ABALIMI kundawana zonke zelizwe bakhuthazwa ukuthi banike inkomo abazalima ngazo ukudla okwaneleyo futhi okwakha umzimba ukuze zimelane lomsebenzi ozayo.
Ekhuluma lentatheli kaMthunywa uProvincial Agritex officer esabelweni seMatabeleland North, uMnumzana Dumisani Nyoni uthe abalimi elizweni lonke nje jikelele kumele banakekele izifuyo abazalima ngazo baziphe ukudla okwakha umzimba.
“Abalimi kundawana zonke zelizwe kabanakekele izifuyo abazalima ngazo ngoba kuqakathekile ukuba isikhathi esiyakuso sokulima lazo zibe seziqinile.
“Inkomo abalimi abazalima ngazo kumele baziphe ukudla okwaneleyo ngoba ukulima kungumsebenzi omkhulu ezikhangelelwe ukuwenza,” kutsho uMnu Nyoni.
Ukhuthaze abalimi ukuthi bathengele inkomo zabo ukudla kwama-supplements.
“Abalimi kabalungiselele inkomo lezi zithole ukudla kwama-supplement ukuze bengalahlekelwa yizifuyo zabo ngoba endaweni ezitshiyeneyo zelizwe utshani sobatsha okutsho ukuthi abusela ukudla okweneleyo.
“Kwezinye indawana akusela tshani sobubulutshwana, lanxa zingazama ukuba zihambe emadlelweni zidinga ukudla kazisuthi.
“Kungakho kumele abalimi bazame ngazo zonke indlela ukuba baziphe ukudla okuthengwayo ukuze isikhathi sokulima sesifika seziqinile zenelise ukuba zidonse amakhuba kulinywe emasimini.
“Izulu lonyaka lilutshwana ngakho inkomo abalimi bangalima ngazo ziyacaka kukanti bangaze bazinike ama-supplement zilakho ukuba lazo zibe lempilakahle eqondileyo zingacubi ngoba seziqedwe amandla yikulima,” kuchasisa uMnu Nyoni.
“Inkomo esezindala ezingasela mazinyo lazo kumele zincediswe ukuba zinikwe ama-supplement njalo kazisamelenga zihambe imango emide kakhulu.
“Kwesinye isikhathi ziyabe zidinga amanzi loba ukudla ngakho konke lokhu abalimi kumele bakunanzelele bahlale bekulungiselele ngoba nxa izulu lililutshwana utshani lamanzi konke kucina sokutholakala khatshana kakhulu.
“Inkomo ezimithiyo kanye lezilamathole kumele zigcinakale kuhle lazo ziphiwe ama-supplement ngoba kumele lazo zenelise ukwehlisa uchago lwamathole kukanti ezimithiyo ukuhamba umango omude kuyaphambanisa impilakahle yenkomo ngokwayo kunye lenkonyane.”
UMnu Nyoni uphethe ngokukhuthaza abalimi ukuthi baphathe kuhle izifuyo zabo baziphe ukudla okwaneleyo.
