uMthunywa
Thokozile Mbedzi
ABALIMI kundawana zonke zelizwe bakhuthazwa ukuthi bahlabe inkomo zabo ngenhloso yokuzivikela kumkhuhlane womkhono ngoba uyingozi.
Inhlanganiso ebona ngempilakahle yezifuyo eyeVeterinary Services ikhuthaze abalimi kundawana zonke zelizwe ukuba bahlabe izifuyo zabo ukuze bazivikele kumkhuhlane womkhono ngalesi sikhathi.
Ekhuluma lentatheli kaMthunywa uDokotela wezifuyo uPollex Moyo uthe abalimi kabavikele inkomo zabo ukuze bangalahlekelwa yinzuzo yabo.
“Abafuyi khathesi kabahlabe inkomo zabo ukuze bazivikele kumkhuhlane womkhono ngoba uyingozi. Ngalesi sikhathi yikho okumele kuvikelwe khona umkhuhlane womkhono,” kutsho uDkt Moyo.
Uthe abafuyi kubalulekile ukuthi bavikele izifuyo zabo ngoba umkhuhlane lo uhlasela izifuyo lanxa ziqinile njengoba kuyisikhathi sehlobo.
“Ukuvikela izifuyo zingakaguli kungcono kakhulu kulokuthi umlimi aqalise ukugijima sokulezinye esezigula esibayeni.
Uphethe ngokucebisa abalimi ukuthi bakhululekile ukuba bafike emawofisini abo bezodinga ulwazi ngezifuyo ukuze babancedise.
“Amawofisi ethu avuliwe njalo siyabamukela abalimi abafika bedinga ulwazi ngoba vele inhloso yethu yikuthi silondoloze umhlambi wesizwe ngokwenqabela imikhuhlane engabulala izifuyo zabalimi,” kuphetha uDkt Moyo.
