uMthunywa
Ncekwenhle Ncube
BAKHALA ezimathonsi abalimi beBubi kulandela ukuna kakhulu kwezulu kule indawo elicine likhukhula izifuyo zabo okwenze abanye bavala izibaya.
Kubikwa ngemva kweviki ephelileyo kulabalimi abane abalahlekelwe zinkomo zabo ezingu-6 ezibonakale zithethwe ngamanzi.
Lokhu kuza kulandela ukuthi izulu line amalanga edlula amane lingami.
Iphephandaba lixoxisane loMnumzana Nhlakanipho Khabo oyisakhamuzi eQueens ochaze ukuthi walahlekelwa zinkomo ezimbili ngelanga elilodwa.
“Inkomo ezintathu zahamba ngelanga elilodwa. Mina ngezwa sengibizwa ngabafana besithi inkomo zami ezimbili sezihambe lamanzi. Sathi sifika sezwa kuthiwa kuleyomunye ubaba waphetsheya komfula esithethwe ngemva kwezami.
“Kubuhlungu ngoba elinye ithokazi lami lihambe latshiya ithole ebelisamunya. Lonyaka sizaphelelwa yizifuyo nxa izulu lingaqhubeka liwohloka kanje,” kuveza uMnu Khabo.
Intatheli izwe ukuthi umfula uMbembesi uba yingozi phose minyaka yonke ngesikhathi sezulu. Izifuyo ziyathathwa kanti labantu labo bayahamba.
UNkosikazi Sitheni Moyo uthe bayibona inkomo ihamba lamanzi kodwa bangathembi ukuthi ingabe ithethwe iphila.
“Sasilinde ukuthi umfula wentshe ebholohweni likaMbembesi sabona tshazi inyamazana esankomo. Yavela okwamahlandla amabili asizange siphinde siyibone. Abafana bathi ithethwe ngamanzi kodwa kwaba sansumansumane kimi.
“Mina lokhe ngazalwayo angikaze ngizwe kuthiwa inkomo iyathathwa ngumfula. Ngokubona kwami inkomo leyana mhlawumbe yayifile yasithathwa ngamanzi ngemva kokuthi izulu selinile.
“Kodwa kungenzeka ukuthi yayithethwe ngoba umfula lo wawulolaka njalo wawugcwele okokuthi amanzi ayehamba phezulu kwebholoho,” kutsho uNkszn Moyo.
UMnumzana Airforce Hlabangana ongumlisa esigabeni seKopa eBubi uthe kuliqiniso ukuthi inkomo sezithathwa ngamanzi ngoba imifula ihlala igcwele ikhukhula izigodo.
“Udaba olunjalo luqinisekile. Kuke kwafika endlebeni zami ukuthi kubonakale inkomo ithethwe ngumfula emalangeni. Angilalo iqiniso mayelana lenani kodwa ziyahamba lamanzi kulezi insuku.
“Abantu ababone ukuthi izifuyo zabo zivalelwe ngesikhathi njalo bengazami ukuchapha imfula igcwele.
“Imfula leyi iyingozi ngoba ithatha konke labantu. Ngikhuluma nje bedlula abathathu abahambe lamanzi,” kuphetha uMnu Hlabangana.
