uMthunywa
Pathisa Nyathi
Luthakazelelwe usuku lwe-Africa. Mina bengikoBulawayo lapho engiphatheke khona emikhosini emibili. Lamhla ngizalichathekela ngokwenzakala emkhosini wakuqala obukhona ngeSonto eMakhandeni. Lumkhosi ubuqoqwe libandla leFellowship Of God (iFOG) ekhokhelwa ngumfundisi uReverend Paul Bayethe Damasane. Iminyaka yonke ibandla leli liyalenze imikhosi yokukhumbula lona usuku lwe-Africa.
Abanye babanakane ukuthi nxa abantu bengabebandla kabaze bangenele emikhosini efana lale. Lokhu akusikho.
Onsundu ngonsundu kungakhathalekile ukuthi ngumKhristu loba hatshi. Lapha sithakazelela okusihlanganisayo.
Kungakho kuqonde nta ukuthi abamabandla labo baphetheke emikhosini enje.
Ibandla likaMfundisi uDamasane kalikabi lendawo lapho elikhonzela khona. Lisanda kuphiwa indawo eNtumbane.
Abakulelo ibandla baphathekile kulezinsuku becenta lapho abazakwakha khona. Engxenye kungathi sekusiyaphela inyanga kaNtulikazi sebengenela khona.
Ngalolusuku abantu bebevunule okukhomba ukuthi ngabantu abaNsundu. Mina ebengiqgoke isudu ngazibona sengiyindlubu ewele ephokweni. Lami ngomnyaka ozayo ngizakuba sengivitshe ngamadumbu lendlukula ukuze ngiveze uphawu lwethu kwezokuvunula. Abasakhulayo benza imidlalo esikhumbuza ukuthi singabohlanga olunsundu. Laphaya enkundleni kamfundisi kwakuceciswe ngezinto ezifakaza ubuyithi bethu.
Zazikhona izingcebethu, amabhasikiti amalembu alophawu lwe-Afrika kunye lokubaziweyo. Mhlalokho kwakuze labakhonzi abaphuma eNyathi lapho okulelinye ibandla leFOG. Ukusina lokuhlabelela kwathatha isikhathi eside abantwana bawatshila amaqolo kwabakuhle kwabukeka. Ayekhala lamakatali lezigubhu uze ukholise. Ngemva kwesikhathi kweza umfundisi uReverend Damasane laye intshumayelo yakhe emfitshane wayigxilisa phezulu kwalo usuku lokukhumbula ngesikhathi lapho okwabunjwa khona i-OAU lamhla osekuthiwa yi-AU.
Phela inhlangano yembumba le yasungulwa esigodlweni seTopiya i-Addis Abbaba ngomnyaka ka1963 mhla zingamatshumi amabili lanhlanu kuNkwenkwezi. Amazwe amahlanu qha yiwo enza usuku lolu lwabalikhefu.
Lokhu kusuka kudanise ngoba sengathi la amanye amazwe akazihluphi ngosuku lolu. Lokhu kusuka kuxegise ukubambana kwamazwe e-Africa.
Safika isikhathi sokuthi lami ngethule inkulumo yami ebandleni. Mina ngangiyisinxuswa esiqakathekileyo.
Ngagcizelela ukuthi nxa sisithi singabansundu kasitsho ibala lethu. Yebo silebala elinsundu kodwa okuqakathekileyo ngumbono esilawo. Ngenye indlela sithi thina sibona ngelihlo linye. Kulapho okulobuntu bethu khona. Ngaqonqosela ukuqakatheka kosuku lolu kithi ama-Africa.
Ngatsho futhi ukuthi uhlupho lwethu yikuthi savuma lapho sitshelwa ukuthi singabantu abangaphelele abangaphansi kwezinye izizwe. Lokhu kwasingena emathanjeni sakukholwa njengeqiniso. Lamhla sesidelelwa ngezinye izizwe. Lenotho yethu sezasithathela thina silokhu siqhuzule amehlo. Sehlulwa yebo kodwa sacina sinqobile. Pho ukunqoba kwethu kwasebenzani nxa sisenza sengathi ngabantu abangaphelele?
Ngemva kokuphela kwenkonzo kweza isikhathi sokudla. Kwakungasikudla kodwa sijikijelana ngakho. Mhlalokho kwakuphekwe ukudla kwesintu: imbambayila, umxhanxa, amahewu amasi, itshakada. Inyama yenkomo, amazambane akhanzingiweyo kunye lamacimbi. Sadla njengezintandane loba ngithi iziphepheli ezilensuku zingadli. Saswela nje ukuthi sidle kuphi sithiye kuphi. Ngadla isisu saze sababomvu. Sathi sisuka lapho sengigomela njengomuntu olofuba. Lwaba luhle usuku saziqhenya ngokubangama-Africa. Sesikhangelele umnyaka ozayo lakhona sidle sikhombe ngophakathi siziqhenye ngobuzwe bethu.
