uMthunywa
Edson Khumalo
LIKHALE inyembezi zenjabulo inina leCharlet bucwadlana leShangani emthethwandaba weTredgold koBulawayo ngoLwesithathu kuyonale iviki lapho liphiwa umntanalo elehlukaniswa laye elosuku olulodwa ezelwe.
UTabitha Mtizira wehlise iphika lenyembezi zenjabulo ngemva kokwethulwa kwesinqumo sokuba aphiwe umntanakhe oselomnyaka owodwa ngumantshi uMnumzana Usheunesu Matova.
UMtizira udonsele uRaymond Stoddart ohlala eKensington koBulawayo emthethwandaba emsola ngesihluku sokumthathela umntanakhe elosuku olulodwa ezelwe ngesizatho sokuba kulemikhuba okumele bayiqhube njengama-coloured njalo umntwana uzamnika eselenyanga eziyisithupha, isithembiso angasasigcwalisanga.
Esethula isinqumo umantshi uMnu Matova uchazele inkundla ukuthi amalungelo omntwana wonke ozelwe ngaphandle komtshado uphiwa unina womntwana njalo amalungelo akhe ayafana lamalungelo ebantwini abatshadileyo.
“Ubaba womntwana ozelwe ngaphandle komtshado ufana lesihlobo nje (third party) emntwaneni.”
Umbiko wenhlolisiso kaProbation Officer osetshenziswe njengobufakazi ekwenzeni isinqumo iveze ukuthi uMtizira kufanele aphiwe umntanakhe njalo ukutshintsha indawo yokuhlala ngeke kuphambanise umntwana ngoba ulomnyaka owodwa wokuzalwa.
Umantshi ubuye wabikela inkundla ukuthi akulabufakazi bokuthi uNkszn Mtizira ngeke enelise ukugcina umntanakhe ngoba wake wazama ukukhipha isisu.
Umantshi uthe uStoddart uzabe ebona umntwana kusukela ngoLwesihlanu ntambama aze ambisele kunina ngeSonto ntambama maviki onke.
