uMthunywa
Thokozile Mbedzi
ZISAKHAKHAMELE izakhamizi zesigabeni esingaphansi kwenduna uChireya, eGokwe ngesenzo selinye inina okubikwa ukuthi lathi ngemva kokuthandana lomfowabo womkalo lambopha lisenzela ukuthi lincinde lodwa uluju lwemvelo.
Kuzwakale ukuthi uCecilia Dube oleminyaka engu-40 yokuzalwa wesiqintini se-Uzumba-Matekenya waba lobudlelwano lomnawakhe womkakhe uEnock Chibhangu oleminyaka engu-30 wasebopha iqhinga lokuthi abe ngowakhe yedwa lanxa ethethe isithembo kungakho wasembopha.
Kubikwa uDube ohlala lomkakhe, wadinga umuthi wawugebhela phansi okwabangela ukuthi ihloka likaChibhangu lingasagamuli.
UMthunywa uzwe ukuba uChibhangu ebona ukuthi sokulohlupho wahamba wayamangala enduneni uChireya.
Induna ibize idale ngeSonto edluleyo lapho okuvele ukuba uDube wabopha uChibhangu ehlose ukuthi abe ngowakhe yedwa.
Ekhuluma lentatheli kaMthunywa uMnumzana Magavhi Mpofu obesedale kuthethwa lelicala uveze ukuthi isenzo sikaNkszn Dube sibamangalisile.
“Silokhu siphelelewe silapha ngoba uMaDube ulomkakhe kodwa nangu usebophe umnewabo womkakhe futhi uyazi ukuthi ulamakhosikazi amabili. Asazi ukuthi umuthi wakhe wasuka wathini ngoba kukhanya ihloka belingasagamuli ngitsho lakuye lanxa wayehlose ukuthi lingagamuli kumakhosikazi akhe kuphela.
“UDube uchaze njalo ukuthi umuthi wokubopha uChibhangu wawugebhela phansi futhi wenza lokhu ngoba engafuni ukuthi amakhosikazi kamfowabo athole injabulo ayitholayo.
“Kusethusile lokhu ngoba uMaDube ubezikhulumela ngowakhe umlomo ukuthi kwaba liphutha ukuthi ihloka lekele ukugamula ngitsho lakuye,” kulandisa uMnu Mpofu.
Induna uChireya ibuzwa ngodaba lolu ithe uNkszn Dube uchaze ukuthi wazigebhela yedwa umuthi wokubopha umfowabo womkakhe ngoba esazi imithi njalo uthe uzamlungisa yena.
“UMaDube sizamhlawulisa ukuze lokhu kube yisifundo lakwabanye abesifazana abangafisa ukwenza isenzo esifana lalesi,” kuphetha Induna uChireya.
