uMthunywa
Khulu
Yelatshwa ngani into enje?
KHULU ngiyinkazana ele-20 years ngathandana lomunye ujaha kodwa sonela ukuthi sihlangane emacansini kangiselalo uthando njalo sesehlukana. Ngahlala inyanga ezimbili ngingangeni esikhathini ngisizwa ubuhlungu obufana lesilumo ngiphuma izinto ezimhlophe ezinuka phu ezinjengesitshwala. Khulu ngenze njani ngoba kuze kube khathesi lokhu kungenza kwesinye isikhathi kuyangihlanzisa ngicine ngifisa lokufa.
Emaceleni kwendlebe zabomama ngaphuma amaqhubu kodwa kawabuhlungu nginceda Khulu sengihluphekile. Lamaphenti ami sehlala enuka, isisu sakhona singaqalisa ngitshaywa likhanda ngingaze ngidle umlomo wami usala uduma. Yelatshwa ngani into enje?
Impendulo
Mzukulu wami othandekayo ngiyabonga kakhulu ngoba uhle waqondana lami ngesikhathi ususiya kwehlelwa yingozi, isimo okuso kutsho ukuthi ulenjovela. Kulemikhuhlane okuthiwa yisiki, intontisa, injovela, lengulamakhwa. Wena olakho yinjovela. Isigangi somfana lesi sakutshiya ulalowo mkhuhlane. Iqiniso elipheleleyo yikuthi isimo leso osichasisayo sitsho ukuthi usuzithwele kodwa umntwana ongasoke aphile nxa ungaphangisanga waya ekilinika noma esibhedlela lapho abazakwelapha khona ngoba lokho oyikho khona kuyenzakala ukuthi umntwana angakhula esibelethweni kodwa afe. Ungaphangisa uye esibhedlela bayakwelapha, uhlambululeke. Ungaze wesaba bonana labezempilakahle. Yenza njalo ntombi yami.
Kungani ngikhamisile ngasese
Ngicela ukubuza Khulu kambe nxa ngingazange ngithungwe ngibeletha kodwa ngisizwa ukuthi kungani ngikhamisile ngilakho ukuyathungwa yini ngemva kweminyaka emibili. Ngiqonde ngaphi ngoba sengiligabha.
Impendulo
Kulezihlahla zakhona mzukulu ezisetshenziswayo. Izihlahla lezi uyazivunula besezimumatha, ukumumatha kwazo yikubuya komzimba wakho, besekusithi ntambama nxa usulala uhlambulule uzigezise nxa sokukulindima sokusitsho ukuthi ngabe sikhuluma sikhangelene ngikuphe izihlahla zakhona. Yenza njalo. Angingeze ngikutshele ngalezizihlahla ngoba singathathela abanye umsebenzi kodwa nxa sikhuluma sikhangelene ngiyabe ngikuxoxela ngezihlahla lezi. Siyabonga ungadeli khuluma loKhulu njalo.
Ngiqeda iviki yonke ngisesikhathini
Khulu sengikhathele ngokungena esikhathini ngiqeda iviki yonke ngisesikhathini. Ngicela ungincede ngiqume amalanga la njalo lesilumo laso singithwalele ubhulo.
Impendulo
Into yokuqala mzukulu zama ukwelapha isilumo ngoba isilumo olaso ngesiduna esiqeda inzalo. Akuvamanga ukuthi kuvalwe umophelo khona kungelatshwanga isilumo ngoba yiso esiyimbangela yomophelo. Ngiyakwazi ukuthi ngingathini kuwe kodwa besengisehluleka ngenxa yezigulane ezingafuni ukukhunga ukwelatshwa kwazo.
Ngokomthetho walo umkhuhlane umuntu kahlawuliswa. Angazi nxa singahlangana ngikucelele kubogogo bakuphathaphathe bangakuncedisa, uhlupho yikuthi ugogo angakwelapha wena awusafuni ukukhunga ngoba yena kasoze akutshele inhlawulo yakhona, kungumthetho lokho. Zama ukukhuluma labantu.
