uMthunywa
Umbuzo
LINJANI Khulu? Ngilohlupho, ngangihlala lomama omncane manje ngageza ngatshiya ibhulugwe lami laphakathi phandle walibona wangitshela ukuthi bazangiloya abantu ngikhawule kusukela khonapho inkunzi iyala ukuvuka. Ngenzenjani ngisiza bo nxa kulungiseka ngincediseke sengithwele nzima.
Impendulo
Kukudala ekweluseni ngabe sesikunathisa umvunsankuzi nje, uyelala esibayeni sembuzi, kodwa abantu banamuhla uthi engathi cha, nje uzwe kuthiwa usebhinye omunye. Kungasenani mzukulu kwesinye isikhathi akula kuloywa kumbe ukubotshwa lapha. Ngubani othe unyoko omncane ugada ihombela kanti. Kungaba kuyikucabanga inkulumo yakhe nje okwenza ihloka lakho lihle libe buthundu. Kanti linkunzi yakho, ibhongela bani phela lapha ekhaya njengoba ungakubekanga sobala ukuba wena uyisima kanjani. Bonana labokhulu bakunike imbiza unathe, konke lokhu kuyaphela. Amadoda kudingakala ukuba sikuzwisise ukuba ukuba buthundu kwehloka akutsho ukubotshwa kumbe ukoloywa ezikhathini ezinengi. Kungenzeka ukuba kungabe kubangelwa yisizulazulane sengqondo nje, lokhu ngesi Ngisi abathi yi “stress” kumbe ukucabanga kakhulu. Kuyadingeka ukuba nxa umuntu esiya emacansini ahambe ingqondo zakhe zikhululekile. Esikhathini wena wezwa elokuloywa wahle wakholelwa khona kube kanti ngesinye isikhathi unyoko omncane waye habaza nje, kungelalutho.
Umbuzo
NGINGUMAMA oleminyaka engu-26 ngenda kuminyaka emithathu edluleyo. Bengihlala labakwethuzala sonke lesi isikhathi. Khulu bengithwele nzima abakwethuzala bebengipikisa ngigqoke ezami umkami laye ubengitshaya abazali bakhe bengenzi lutho ngakho. Kungakho Khulu ngacina ngibona kungcono ukuthi ngizihambele eGoli ngiyedinga umsebenzi, umntanami oleminyaka emine ngamtshiya lodadewabo womkami. Umkami ebona lokhu wangilandela khathesi sihlezi kuhle sonke. Uhlupho-ke sekuyikuthi abangakibo bayamthumela ama-sms bebuza ukuthi kungani mina ngingabafoneli. Khulu ngiyehluleka ukubafonela abazali bomkami ngoba ngileqhubu emoyeni wami. Ngingakhumbula ababengenza khona ngiyahlengezela inyembezi. Ngincedissa Khulu ngenzeni ngalindaba?
Impendulo
Impilo livili liyagiqika nje, lezinto ziyaguquka. Isimo sayizolo namuhlanje sivuka kungesinye, kungakho lawe vuma ukuba izolo liyembelwa. Kungenzeka ukuba konke lokhu ababekwenza babekwenza ngesikhathi sokungazi, njalo besemnyameni, okwamanje wena uyiso isitsha sokudlela. Abanengi abasemendweni bayafisa ukwakha ubudlelwano obuqinileyo labakwabozala, kungakho ke lawe ziduduze uthi yonke into ilesikhathi sayo, okwadlulayo kakufuni umuntu abe elokhu ephanda amangcwaba. Yixoxe lomkakho lindaba ukuze umoya wakho ubhodle, ngoba umendo yikuba likhulumisane kuhle lezihlobo zabakwenuzala, hatshi ukukhangelelana emanzini. Kutsho ukuba bona sebefundile njalo sebezisola ngesenzo sabo yikho sebehlala bezama ukuphemba umlilo kuwe. Ukuhlala lingakhulumisani kahle labakwenuzala bakho, kulakho ukucina kuzala umfukula wempethu ezakhathaza lasendlini yenu futhi ngoba lomkakho kange akuzwisisa ukuba uhlale ungakhulumisani labazali bakhe. Zama ngamadla wonke ukuxola, lawe ubamukele benjalo.
Umbuzo
Linjani Khulu? Unkosikazi wami ngiyamthanda kakhulu njalo ngiyabe ngifisa ukuthi sihlangane emacansini nsukuzonke kodwa yena kafuni uthi kumele sihlangane kabili kumbe kathathu. Ngenzeni Khulu ngoba ngiyalamba? Ngiyabe ngiphambanisile yini nxa ngingathatha omunye ozamncedisa njengoba esehluleka ukungisuthisa kulokuthi ngihambe ngidinga phandle.
Impendulo
Ukuzula phandle akuncedi mzukulu ngoba kugcwele imikhuhlane kunye lezinto ezehlukeneyo ezingelakusasa enhle yomuzi wakho. Ungathi ufika phandle uthole umfazi obukhali, oyibiza phansi laphezulu awungeke waphenduka endlini ngoba uzabe usuthole okufunayo. Hlala phansi unanzelele izinto ezehlukeneyo ngempilo yenu yemacansini, ungakakholelwa ukuba unkosikazi wakho livila. Nanzelela ukuba indlela elenza ngayo umdlalo wemacansini akubi yidlela nye ecina vele isidina lapha endlini. Kuze kuthi nxa litshona ilanga umfazi akhumbule ukuba engakubona usugila imikhuba ethize kutsho ukuba sezikhala. Dinga indlela ezehlukeneyo zokuya emacansini ezenza wonke umuntu akukhwabithe. Lokhu kuzanceda lawe imbala.Uzezwa usiba ledlabuzane eliphindiweyo.Xoxani ngezemacansini ngoba eqinisweni yikho okulihlanganisileyo. Ngesikhathi, sokuphothululana, mbuze ngelipholileyo umkakho, uthi, “sithandwa sami sengifile mina, sengifuna ukungena phakathi. Pho wena ubufisa senze njani namuhla? Nceda themba lenhliziyo yami, inhlanyelo ingaphumela phansi.” Lokhu ngokunye okungamthukulula laye ukuba abe lesabelo sokutsho ukuba ufuna ukujabulisa njani umzimba wakhe, njalo kuzamnika isibindi lethemba lokuba laye uze wenza okufisayo lawe wakhanya ujabule. Okubulala amacansi ezindlini yikuba obaba, kuba yibo nje abazenzela umathanda, umama libhasikili eligadwa umuntu esefuna. Ilizwi labomama lilesisindo endlini, ikakhulu emacansini kungakho ke labo kabanikwe isabelo. Ngithemba, njalo ngibona awukafiki esigabeni sendlala engaze ikudingise umama, wesibili. Lola unkosikazi wakho, umnikeze amandla ekukhulumeni ngocansi, uzabona umehluko.
