uMthunywa
Umkami uyangitshaya
Umbuzo
NGITHEMBA uqine saka khulu. Sengilenyanga ezingu-18 ngendile njalo ngilomntwana. Umkami laye ulowakhe umntwana lomunye umama. Khulu ngiphila impilo ebuhlungu kakhulu angisazi ukuthi ngenzeni sengathi ngathathwa yinyamazana ngokwayo. Lokhu ngikubone sesihlala sonke.
Umkami katshayi uyabulala. Khulu ngingavele ngiphambanise ngiyabulawa kwezinye izikhathi lanxa ngingonanga lutho ngiyatshaywa. Yena kaphambanisi njalo kabongi ngingaze ngenze okuhle. Lokuhlangana emacansini akukho sihlangana kanye ngenyanga mhla efuna yena. Ngenzeni Khulu ngikhathazekile emoyeni.
Impendulo
Indaba oyikhulumayo iyangivavula amaphaphu ngicine sekungathi ngingumntwana wenyamazana abantu bengekho.
Ububi bakhona abantu abanje kahle ngikuchazele kabanzi kumbe kabalanzalo uvele lo umntwana athi ngowakhe wamzalelwa. Yikho umfazi wakuqala wabalekela ukuthi uzabeletha abantwana bezixukwini ngenxa yendoda engazaliyo. Isihluku samadoda anje yikuthi ayaphangisa ukubhadala amalobolo esenzela ukuthi abangakini bangabuboni ububi bakhe.
Mzukulu akukhulume ledombo lenu ulibikele ngokuhlukuluzwa okwenziwa ngumkakho ukuze abadala bamkhuze, kungehlula lokho kulezinsuku sokulomthetho omutsha owe-Domestic Violence Act qonda enkambeni yamapholisa uyewabikela ngalokhu ukuze athole isigwebo esimfaneleyo ngoba phela uyabe usuzamile kodwa kwehlula.
Ngakho ungatshoni ubekezela usiyakhatshana ngoba ezakubulala. Tshiya mama lingavele lilungise udaba lwenu lokwehlukana ungathandabuzi ukudinga umsebenzi ukuze wenelise ukugcina umntanakho.
Abazali kabafuni mkhwenyana ongasonti lathi
Umbuzo
Linjani Khulu. Ngilejaha engithandana lalo kodwa uhlupho yikuthi abazali bami bathi kumele ngithathwe ngumuntu esisonta sonke. Mina ngileminyaka engu-25 njalo ngiyakholwa ukuthi sengimtholile usofa silahlane wami. Ngenzeni ukuthi abazali bami bamukele ijaha lami ngoba bathi ngingaqali ukuletha umuntu esingela kholo olufananayo.
Nceda Khulu angifuni ukwehlukana lesithandwa sami.
Impendulo
Ngiyahlukuluzeka mzukulu nxa ngifunda amazwi owakhulumayo. Ukukhomba lokuthathana okwalezi izikhathi yilokhu, umuntu uthandana lomuntu osemhlabeni ahlala kuwo, ngakho into le kufanele ikukhathaze. Kuyinto enzima kakhulu ukuzibophela ejaheni elilokholo lwesonto lona lingela thando ngentombi elikhonza layo. Mzukulu isinqumo sakho sifanele sibili ngoba akulunganga ukuzibophela emuntwini ongelathando kuwe.
Lokhu kucina kubangela ukuchitheka kwemizi ngoba amajaha lezintombi bayabe behlanganiswe lukholo lwabo kukanti-ke abantu bahlanganiswa luthando lokuzwanana. Mzukulu zama ukukhuluma ngalokhu lomalumakho noma ugogo bangenele kundaba le. Ungamekeli usofa silahlane wakho ngoba uthando yilo olumelana lezifungo zokuthathana.
