uMthunywa
Umkami usejola
Ngileminyaka engu-28 ngendile ngilabantwana ababili. Umkami wenza ibhizimisi njalo siqala ukwazana ubesaqala manje sesathenga izimota sakha indlu yethu sisonke.
Inkinga yikuthi usejola njalo kangihloniphi njengomkakhe. Nxa ngithi ngiyakhuluma uthi angihambe manje ngeke ngoba side isikhathi esengisichithile.
Ngike nganatha umuthi wokuzibulala ngenxa yezenzo zakhe ngafuna lokuzitshisela endlini ngoba ngeke ngiphume omunye ezongena lula. Ngiyamthanda Khulu, kangazi ngenzeni. Ngibonisa Khulu.
Impendulo
Kumele uthule nxa esexotshana lezidandane, wena zithulele ngoba labobantu ahamba labo yisivunguzane sebusika esithi kungana izulu intuli azisabonakali.
Ungaxabani laye ngokukhuluma kakhulu, wena thula kuphela. Asiyo into engakwenza ukuthi uchithe umuzi leyo. Nxa sokunje, angafuni omunye kaphume endlini.
Nakekela abantwabakho konke akulandaba ngaphandle komuzi wakhe, kuzaphela ngokuthula kwakho.
Umkami kangitsheli qiniso
Ngithemba uqine sakaKhulu, ngingusisi ole-27 years ngendile labantwana ababili. Ngathandana losabantwana ngo2008, leso sikhathi wayelomama womntanakhe oyedwa lubaba wathi kimi balezinkinga ku-relationship yabo.
Waphinda wathi umkakhe kafuni ukuyahlala ekhaya kungakho wathi kasamthandi, mina ngavuma ukuyahlala ekhaya.
Kungakho ngo2012 ngabuya eGoli ngifuna ukubona ukuthi wehlukana lomkakhe ngeqiniso ngamthola ehlala yedwa for 2 months ngasengisiyahlala-ke ekhaya.
Uhlupho yikuthi ngahlangana lesinye isihlobo sendoda sathi kimi ngifunani esithenjini ngimncane kangaka mina ngathi angikho esithenjini wathi umkami kazange ehlukane lomkakhe, lokhu bethandana futhi balomntwana omncane. Mina sengilabantwana ababili. Umkami nxa ngimbuza uvuka ngolaka kangiphenduli, ngile-stress ngilapha, kangisakwazi ukuthi ngithini, ngihlale kumbe ngimtshiye.
Impendulo
Zwana mina mntwana ukutshiya lokuhlala ngenye indlela. Ijaha lakho leli liyakunika ukudla na? Liyakugqokisa na? Liyakunanza yini na? Ubonanzelela mntanami emhlabeni lapho kulabo lahlangihleke, olahla ngidobhe, okhafula ngiginye.
Yizo i-character zabanye abantu emhlabeni. Awuboni yini ukuthi uphakathi komhlane lembeleko?
Ijaha lakho liyakuthanda kodwa lilula emkhumbulweni wokuzithiba. Nxa yena engakutshelanga lokho ekubonisa izizatho zonezo engikutshele zona ekuqaleni ungazihluphi ngabothathawese.
Vala umlomo uthule uthi zwi, ugcine abantwana benu. Impilo yomuntu ifana lomgwaqo olamadundulu. Uzathi uthi uyatshiya, iqiniso lithi lingatshona ilanga wonke uyaphumula, funa uthi uyaphumula uphumule emlindini ohlala inyoka.
Ukuhwabha lolaka lomkakho yikuvikela indaba yothando lwenu. Uzatshiya uthi uboneni. Thula uthi zwi uginye isidwa ungabi yinhlekisa esigabeni ngokutshiya umuzi wakho. Yebo kambe thina seyedlula indulo eyayisithi inkunzi ilola impondo ezidulwini.
Mfanami ezakhathesi iziduli zilempolompolo. Sengithe ungayingeni eyokuzwa. Iqiniso lithi okulempondo akugoqelwa emgodleni, zekele impondo zizithutshele. Phola ntombi uthi zwi ungakhathazeki njalo ungahlokozi inyoka emlindini wayo.
