uMthunywa
Nceda Khulu! Ngiyachema engutsheni
UMBUZO
KHULU linjani? Ngingumfana oleminyaka engu-14 uhlupho yikuthi ngiyathambisa engutsheni nxa ngilele.
Nginceda Khulu ngoba isikhathi sesihambile.
Impendulo
Ngiyaphila mzukulu. Isehlakalo leso olaso sitsho ukuthi isinye sakho sibuthakathaka asilamandla okumumatha umchitho. Kumele uye ekilinika eseduzane ubatshele. Esibhedlela bazakunika umuthi owenza umgwaqo wakho womchitho umumathe umchitho nxa ulele. Njalo nanzelela ungaze wanatha utshwala noma kuyini okuyindakiso.
Zona lezizinto ezidakayo ziyahlala kakhulu esinyeni esibuthakathaka, ugule indakiso icine isikwenza ungabi lenzalo. Imithambo yakho ingavele ibe lula umfutho wendakiso lezidakamizwa kuyazuza indawo yokuhlala, ubusucina usungumuntu ongelabantwana. Ungehlukani lalumlayo engikutshela wona, phangisa. Yinto eyazakalayo le. Ngomusa zama lokhu, hamba uyegebha impande zendumbo ezesibantu uzibilise emlilweni zithi nxa sezihabuleka uzinathe sezindikindiki. Unathe okulingene inkomitsho yetiye encane kanye ntambana okwamalanga amahlanu. Nxa kulokhu kuphikelela uhambe uyephathiswa esibhedlela. Kuyaphangisa ukukhawula ngaleyo ndlela.
Ngenxa yomusa lothando kuwe mzukulu sengifundisile abantu lezinyanga ebezingazi lokho ngenxa yakho.
Abanye bazanxapha ukuthi kungani ngithukulula ifindo lemfihlo yenzuzo yabo. Buya njalo nxa kungapheli ngendlela le esilayelana ngayo. Angithi awuzange ubulawe yibhilehaziya. Layo iyakwenza lokho.
Ubabomdala usemithisile, ngimtshele yini umkakhe?
Umbuzo
Linjani Khulu ngicela ukubuza kulosisi esende ndawonye. Yena uthethwe ngumnewabo womkami. Indaba le imi kanje, ngekhefu lika-2012 ngoMpalakazi savakatshela ekhaya ubabomdala watshiya umkakhe ezithwele thina saphenduka edolobheni. Isimanga yikuthi khathesi ngoNhlangula sithe sisiya emfeni safica kulentombazana endlini kababomdala kwathiwa ukhalaliwe uzithwele isisu sakhe. Ubabomdala uthethe njalo ulomntwana. Inkinga nansi, wonke umuntu uyazi ngaloludubo ngaphandle komkakhe. Ngimazise kumbe ngizabe ngiphambanisile ngoba wonke umuntu uyakwazi yena nguye ongakwaziyo kuphela.
Impendulo
Zwana mzukulu yekela ikhule lokhula. Amasu endoda lomuzi wayo akulamuntu owaziyo. Funa umtshele kanti usuyikhulumele emasekweni. Ubaba lo mhlawumbe ebeseluka icebo ukuthi angawutshela njani umuzi wakhe.
Funa umtshele khathesi unkosikazi wangakwakhe abuye adukluze isisu somfazi ozithweleyo ngolunya lolaka acine ezala umntwana ofileyo noma untombazana lo afe ezithwele ngoba esetshayiwe. Oyabe esebulele ngubani?
Yiyo le indaba oyake uzwe nxa kuxoxwa bathi bona izinto zonke zizoba sobala. Uzamangala sokuthiwa nguwe obulele umuntu sekungasatshiwo ukuthi nguwe owabulalisa umuntu. Ungazama ukungena indaba zabathandanayo, bacina sebekuphendukela bekuhlamukela bethi phuma ezintweni zethu. Noma esekubuza unkosikazi walo ubaba esithi yindaba ungazange umtshele wena uthi ngangisithi ukutshelile. Ube usuzithulela.
Kuzavela kuphela. Awazi yini ukuthi inhloko yembuzi elempondo ayithandelwa ngamahlamvu noma ngamaphepha.
Angifuna ukuyasokwa
Umbuzo
Ngiyindoda eleminyaka engu-30 ngiliXhosa leMbembesi. Abadala bathi ngiyesokwa njengokwesiko mina angifuni njalo angiboni sizatho salokhu. Ngenzeni Khulu? Ngibatshele njani Khulu ngoba angizethembi ngoba ngiyazi lapho esengadlula khona. Angifuni kuxabana labazali bami futhi.
Impendulo
Mina lokhu mzukulu yikho engikwaziyo. Uhlupho olalo wena lusengqondweni yakho hatshi empilweni yamaXhosa. Ungakwenza ukwala ubususiya sokwa esibhedlela, kungaze kwakukhathaza ubenekhankatha lomfazi kodwa inyaniso ithi uyabe usoke lula kulokuyakhangelana namalema. Uyoyika kangaka into lena othetha ngayo uthetha inyaniso yezifiso zakho. Yinto yasemdeni yakwenu izithelo zayo zenza uhlonitshwe ubenembeko eyodumo labakwenu. Cabanga ungaphathekanga ngomsebenzi ngena ejokweni ukuze amathamsanqa akwenu angabi kude nawe. Injongo ekhangelwe ngabantu bakwenu ithi yona ngokusoka usugqibile ubuntu bokuba yindoda. Impendulo yami ithi kungaba njani uhambe uye ebantwini abalelungelo lokusoka ngesivumelwano sikaHulumende uyesokwa.
